စင်ကာပူရှိ သက်ကြီးရွယ်အို အမျိုးသားများ အထီးကျန်မှုနှင့် စိတ်ဓါတ်ကျဆင်းမှုတို့ကြောင့် စိတ်ကျန်းမာရေး အန္တရာယ် အမြင့်ဆုံးအုပ်စု ဖြစ်လာ

စင်ကာပူနိုင်ငံတွင် အသက် ၆၀ နှင့်အထက် သက်ကြီးရွယ်အိုများအကြား အသက်စွန့်သူ ၄ ဦးတွင် ၃ ဦးမှာ အမျိုးသားများဖြစ်နေပြီး အလုပ်မှ အနားယူခြင်း၊ ကျန်းမာရေး ယိုယွင်းလာခြင်း၊ လူမှုအသိုင်းအဝိုင်း ကျဉ်းမြောင်းသွားခြင်းနှင့် စိတ်ခံစားချက်များကို ထုတ်ဖော်ရန် ဝန်လေးခြင်းတို့ကြောင့် အဆိုပါ အသက်အရွယ်ရှိ အမျိုးသားများသည် စိတ်ကျန်းမာရေးနှင့် ပတ်သက်၍ အန္တရာယ် အရှိဆုံး အုပ်စုဖြစ်နေကြောင်း ကျွမ်းကျင်သူများက ထောက်ပြထားသည်။အမျိုးသားအများစုသည် ၎င်းတို့၏ ဖြစ်တည်မှု၊ နေ့စဉ်ဘဝနှင့် မိသားစုတာဝန်များကို အလုပ်အကိုင်အပေါ်တွင်သာ အဓိက အခြေပြုလေ့ရှိကြသဖြင့် အနားယူချိန်တွင် အထီးကျန်မှု၊ ဦးတည်ချက်ပျောက်ဆုံးမှုနှင့် စိတ်ဓါတ်ကျဆင်းမှုများကို ပိုမိုပြင်းထန်စွာ ရင်ဆိုင်ရလေ့ရှိသည်။ ထို့ပြင် စိတ်ခံစားချက်များကို ထုတ်ဖော်ပြောဆိုရန် ပညာပေးခံရမှု အားနည်းခဲ့သည့်အတွက် ရောဂါလက္ခဏာများကို ရုပ်ပိုင်းဆိုင်ရာ နာကျင်မှု သို့မဟုတ် အပြုအမူ ပြောင်းလဲမှုများဖြင့်သာ ပြသတတ်ကြသည်။ ကျွမ်းကျင်သူများက သက်ကြီးရွယ်အို အမျိုးသားများအတွက် သမားရိုးကျ ဆွေးနွေးပွဲများထက် ဝါသနာပါရာ လက်တွေ့လှုပ်ရှားမှုများ၊ စေတနာ့ဝန်ထမ်း လုပ်ငန်းများနှင့် ကျွမ်းကျင်မှု ဖလှယ်သည့် အစီအစဉ်များမှတစ်ဆင့် လူမှုဆက်ဆံရေး ပိုမိုခိုင်မာအောင် ကူညီပေးရန် အကြံပြုထားသည်။