တောင်ကိုရီးယားဝမ်ငွေ တန်ဖိုး ၂၀၀၉ နောက်ပိုင်း အမြင့်ဆုံးနှုန်းဖြင့် ပြန်လည်မြင့်တက်လာ

တောင်ကိုရီးယားနိုင်ငံ၏ ကမ္ဘာကျော် ဆေမီကွန်ဒတ်တာ ထုတ်လုပ်ရေး ကုမ္ပဏီဖြစ်သော SK hynix ၏ အမေရိကန် နက်စ်ဒက် (Nasdaq) စျေးကွက်တွင် အမေရိကန်ဒေါ်လာ ၂၆.၅ ဘီလီယံ (ဝမ် ၄၀ ထရီလီယံခန့်) တန်ဖိုးရှိ ADR စံချိန်တင် အစုရှယ်ယာ ရောင်းချမှုမှ ရရှိသည့် ဒေါ်လာများကို ကိုရီးယားဝမ်ငွေသို့ အများအပြား ပြန်လည်လဲလှယ်ခဲ့ခြင်းကြောင့် ကိုရီးယားဝမ်ငွေ တန်ဖိုးသည် ၂၀၀၉ ခုနှစ် မတ်လနောက်ပိုင်း တစ်လအတွင်း အမြင့်ဆုံး တိုးတက်မှု နှုန်းထားကို စံချိန်တင်ခဲ့သည်။ယင်းကဲ့သို့ ဒေါ်လာပမာဏ အမြောက်အမြား လဲလှယ်မှုကြောင့် ဇူလိုင်လအတွင်း ကိုရီးယားဝမ်ငွေ တန်ဖိုးသည် ၈ ရာခိုင်နှုန်းခန့်အထိ မြင့်တက်လာခဲ့ပြီး ၁ ဒေါ်လာလျှင် ၁,၅၉၉.၂ ဝမ်အထိ ကျဆင်းခဲ့သည့် ၁၇ နှစ်တာ အနိမ့်ဆုံးနှုန်းမှ ၁,၄၂၄ ဝမ်ဝန်းကျင်သို့ ပြန်လည် ခိုင်မာလာခဲ့သည်။ အဆိုပါ တိုးတက်မှုသည် ဂျပန်ယန်းငွေ အပါအဝင် အာရှဒေသတွင်း အခြား ငွေကြေးများထက် ပိုမိုအားကောင်းသည့် စွမ်းဆောင်ရည်ဖြစ်ပြီး တောင်ကိုရီးယား ပို့ကုန်လုပ်ငန်းရှင်များကိုပါ ဒေါ်လာများ ပြန်လည်ရောင်းချစေရန် တွန်းအား ဖြစ်စေခဲ့သည်။