ဧရာဝတီတိုင်းဒေသကြီး၊ လေးမျက်နှာမြို့နယ်ရှိ ငဝန်ရေကာတာ တာဘောင်ကျိုးပေါက်မှုဖြစ်စဉ်တွင် တာဝန်ရှိသူများ၊ လုံခြုံရေးအဖွဲ့ဝင်များ၊ မီးသတ်တပ်ဖွဲ့ဝင်များနှင့် လူမှုကူညီရေးအသင်းများ ပူးပေါင်း၍ အမြန်ဆုံး ပြန်လည်ပြင်ဆင်လျက်ရှိသည်။ လက်ရှိတွင် ကမ်းရင်းတာ (တာဟောင်း) ရေတိုက်စားမှု ကာကွယ်ရန် Geo Bag ကမ်းထိန်းအိတ်များ ချခြင်း၊ မျောတုတ်တန်းကာ၍ သဲအိတ်များ ဖြည့်ခြင်းနှင့် ပေ ၁၂၀ ရှိ ရေဝင်ပေါက်အတွင်း ရေစီးကြောင်း အရှိန်လျော့ကျစေရန် သဲအိတ်များဖြင့် ပိတ်ဆို့ခြင်းတို့ကို ဆောင်ရွက်လျက်ရှိသည်။ ထို့ပြင် ရေနက်စီးကြောင်း ပိတ်ဆို့ဟန့်တားနိုင်ရေးအတွက် ကျောက်ဖြည့်သံခြင်းနှင့် Geo Bag များ ချနိုင်ရန် စက်ယန္တရားများ ရောက်ရှိပါက ဆက်လက်ဆောင်ရွက်သွားမည် ဖြစ်ကြောင်း သိရသည်။
