မန္တလေးတိုင်း၊ ပုဂံမြစေတီရှိ ရာဇကုမာရ်ကျောက်စာရုံအတွင်း ငွေကြေးလှူဒါန်းခြင်း မပြုရန် အသိပေး

မန္တလေးတိုင်း၊ ပုဂံမြို့ဟောင်း မြင်းကပါကျေးရွာရှိ မြစေတီဘုရားတွင် ကမ္ဘာ့အမွေအနှစ်စာရင်းဝင် ရာဇကုမာရ်ကျောက်စာ ထားရှိရာ ကျောက်စာရုံအတွင်းသို့ ဘုရားဖူးများ ငွေကြေးပစ်သွင်း လှူဒါန်းခြင်း မပြုရန် ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ပုဂံဌာနခွဲ) က အသိပေးထုတ်ပြန်ထားသည်။ အဆိုပါ ရှေးဟောင်းကျောက်စာတိုင် ထိခိုက်ပျက်စီးမှု မရှိစေရန်၊ လေ့လာသူများ အနှောင့်အယှက် မဖြစ်စေရန်နှင့် မြင်ကွင်း မထိခိုက်စေရန်အတွက် ကျောက်စာတိုင်ကို ကာရံထားသည့် သံတိုင်များတွင် သံဆန်ခါအစိတ် ထပ်မံကာရံသွားမည် ဖြစ်သည်။ လှူဒါန်းလိုသူများအနေဖြင့် ဂေါပကအဖွဲ့၏ သတ်မှတ်အလှူခံပုံးများ၌သာ စနစ်တကျ လှူဒါန်းရမည်ဖြစ်သည်။ ပျူ၊ မွန်၊ မြန်မာ၊ ပါဠိ ၄ ဘာသာဖြင့် ရေးထိုးထားသော အဆိုပါကျောက်စာသည် မြန်မာစာအရေးအသား အစောဆုံး ကျောက်စာအဖြစ် ထင်ရှားပြီး ၂၀၁၅ ခုနှစ်တွင် UNESCO ၏ ကမ္ဘာ့မှတ်တမ်းအမွေအနှစ် (Memory of the World) အဖြစ် သတ်မှတ်ခံထားရသည်။