မွန်ပြည်နယ်အတွင်း ဇူလိုင်လ ဒုတိယအပတ်မှစ၍ စက်သုံးဆီ ပြတ်လပ်မှုများ ပြန်လည်ဖြစ်ပေါ်နေပြီး စက်သုံးဆီဆိုင် အများစု ပိတ်ထားရသဖြင့် ပြင်ပမှောင်ခိုဈေးကွက်တွင် တစ်လီတာလျှင် ကျပ်တစ်သောင်းနှင့်အထက် အဆမတန် ဈေးပေးဝယ်ယူနေရကြောင်း သိရသည်။
စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီ၏ ဇူလိုင် ၂၄ ရက် ထုတ်ပြန်ချက်အရ မွန်ပြည်နယ်အတွင်း ဓာတ်ဆီ ၉၂ တစ်လီတာလျှင် ၃,၅၅၀ ကျပ်နှင့် ဒီဇယ် (ပရီမီယံ) တစ်လီတာလျှင် ၄,၅၉၅ ကျပ် ရည်ညွှန်းဈေး သတ်မှတ်ထားသော်လည်း ပြင်ပဈေးကွက်၌ နှစ်ဆကျော်အထိ ဈေးမြင့်တက်သွားခြင်းဖြစ်သည်။ လက်ရှိတွင် ပြည်နယ်အစိုးရက စက်သုံးဆီဆိုင်များကို လိုက်လံစစ်ဆေးကာ လိုင်စင်မဲ့ယာဉ်များနှင့် ပုံးများဖြင့် ရောင်းချမှုအကြောင်းပြ၍ ဆိုင်အချို့ကို ပိတ်သိမ်းခိုင်းနေခြင်းကြောင့် သုံးစွဲသူများအတွက် ပိုမိုအခက်အခဲ ဖြစ်ပေါ်လျက်ရှိသည်။
