တောင်ကိုရီးယား မြေပြင်၊ အခြေခံအဆောက်အအုံနှင့် သယ်ယူပို့ဆောင်ရေး ဝန်ကြီးဌာနသည် ဂျဲဂျူကျွန်းတွင် အသုံးပြုရန် ဒီဇိုင်းရေးဆွဲထားသည့် Urban Air Mobility (UAM) စီးပွားဖြစ် မော်ဒယ်ကို ယခုသီးတင်းပတ်အတွင်း စတင်ပြသမည်ဖြစ်ကြောင်း ထုတ်ပြန်ခဲ့သည်။
အဆိုပါ UAM မော်ဒယ်သည် ဂျာမနီနိုင်ငံအခြေစိုက် Volocopter ကုမ္ပဏီမှ ထုတ်လုပ်သော လေယာဉ်များကို အသုံးပြုမည်ဖြစ်ပြီး ခရီးသွားလုပ်ငန်း၊ သယ်ယူပို့ဆောင်ရေးနှင့် အများပြည်သူဆိုင်ရာ ဝန်ဆောင်မှုများတွင် ထည့်သွင်းအသုံးပြုရန် ရည်ရွယ်ထားသည်။စမ်းသပ်ပျံသန်းမှုကို ဂျဲဂျူကျွန်း၏ အရှေ့ဘက်ပိုင်းတွင် ပြုလုပ်သွားမည်ဖြစ်ကာ အစိုးရတာဝန်ရှိသူများ၊ စီးပွားရေးလုပ်ငန်းရှင်များနှင့် ကျွမ်းကျင်သူများ ပါဝင်သော UAM Team Korea က ဒေသတစ်ခုချင်းစီ၏ လိုအပ်ချက်နှင့် ကိုက်ညီမည့် စီးပွားဖြစ် မော်ဒယ်များ ဖော်ဆောင်ရေးကို ထိုနေ့၌ပင် ဆွေးနွေးကြမည်ဖြစ်သည်။
တောင်ကိုရီးယား အစိုးရအနေဖြင့် ဘေးကင်းလုံခြုံမှုကို ဦးစားပေးပြီး ၂၀၂၈ ခုနှစ်တွင် K-UAM ဝန်ဆောင်မှုများကို စီးပွားဖြစ် စတင်နိုင်ရန် အရှိန်အဟုန်မြှင့် ကြိုးပမ်းလျက်ရှိသည်။
