ရှမ်းပြည်နယ်တောင်ပိုင်း၊ မိုင်းပွန်တံတား စစ်ဆေးရေးဂိတ်တွင် ဇူလိုင် ၂၇ ရက်က ပင်လုံမှ ကျောက်ဆည်သို့ မောင်းနှင်လာသည့် ကျောက်မီးသွေးတင်ယာဉ်အား စစ်ဆေးရာ ကျောက်မီးသွေးများကြား ဖုံးကွယ်သယ်ဆောင်လာသည့် တာယာများ၊ ကားအပိုပစ္စည်းများနှင့် အခြား တရားမဝင်ကုန်ပစ္စည်းများကို ဖမ်းဆီးရမိခဲ့သည်။ အလားတူ ယင်းနေ့၌ပင် အကောက်ခွန်မဲ့ လျှပ်စစ်ပစ္စည်းများနှင့် ယာဉ်အပိုပစ္စည်းများ ရောနှောသယ်ဆောင်လာသည့် ၁၂ ဘီးယာဉ် ၃ စီးကိုလည်း ထပ်မံဖမ်းဆီးရမိခဲ့သည်။ မိုင်းပွန်တံတားဂိတ်တွင် ၂၀၂၅ ခုနှစ် ဧပြီလမှစ၍ လက်ရှိအချိန်ထိ တရားမဝင် ကုန်ပစ္စည်း သယ်ဆောင်သည့် မော်တော်ယာဉ် စုစုပေါင်း ၃၀၆ စီးအထိ ဖမ်းဆီးရမိထားပြီး ဖမ်းဆီးရမိသူများကို လုပ်ထုံးလုပ်နည်းအတိုင်း ဆက်လက် အရေးယူသွားမည်ဖြစ်ကြောင်း သိရသည်။
