တာချီလိတ်၌ လုံခြုံရေး တိုးမြှင့်ထားသော်လည်း ဆိုင်ကယ်ခိုးယူမှုများ ဆက်လက် ဖြစ်ပွားနေသဖြင့် ဝေဖန်မှုများ ထွက်ပေါ်

ရှမ်းပြည်နယ်အရှေ့ပိုင်း၊ တာချီလိတ်မြို့တွင် လုံခြုံရေးတပ်ဖွဲ့ဝင်များက မြို့ပေါ်လှည့်ကင်းများ အင်အားသုံး ဆောင်ရွက်နေသော်လည်း ဆိုင်ကယ်ခိုးယူမှုများ ဆက်လက်ဖြစ်ပွားနေ၍ ဒေသခံများ၏ ဝေဖန်မှုများ ထွက်ပေါ်နေသည်။ ဇူလိုင် ၂၆ ရက် ညပိုင်းက ဆန်ဆိုင်း (က) ရပ်ကွက်၌ လိုင်စင်ပါ ဆိုင်ကယ်တစ်စီးကို လူ ၄ ဦးက ခိုးယူသွားသည့် CCTV မှတ်တမ်းများ ထွက်ပေါ်လာခဲ့ပြီး ယင်းရပ်ကွက်၌ပင် ဇူလိုင် ၂၂ ရက်ကလည်း ဆိုင်ကယ်တစ်စီး ခိုးယူခံခဲ့ရသည်။ ဒေသခံများက မိန်းလမ်းမကြီးများပေါ်တွင်သာ ဟန်ပြလှည့်ကင်း မဟုတ်ဘဲ ရပ်ကွက်အတွင်း လမ်းကြိုလမ်းကြားများအထိ ထိရောက်သည့် ကင်းပုန်းဝပ် ဖမ်းဆီးမှုများ ဆောင်ရွက်ပေးရန် လိုလားနေကြသည်။ တာချီလိတ်တွင် ဇူလိုင် ၈ ရက်က ဆိုင်ကယ်သူခိုးနှင့် လက်ခံသူ ၄ ဦးကို ဆိုင်ကယ် ၁၄ စီးနှင့်အတူ ဖမ်းဆီးရမိခဲ့သော်လည်း ဆိုင်ကယ်ခိုးယူမှုများ သောင်းကျန်းနေဆဲဖြစ်ကြောင်း သိရသည်။