တောင်တရုတ်ပင်လယ်တွင် ဗီယက်နမ်သင်္ဘော နစ်မြုပ်ပြီး လူ ၂၃ ဦး ပျောက်ဆုံးနေ

တောင်တရုတ်ပင်လယ်၊ ဖိုင်ယာရီခရော့စ် သန္တာကျောက်တန်းအနီး၌ ဗီယက်နမ်နိုင်ငံသား ၆၂ ဦး လိုက်ပါလာသည့် ကုန်တင်သင်္ဘော Khoi Nguyen 18 နစ်မြုပ်ခဲ့သဖြင့် လူ ၃၉ ဦးကို ကယ်ဆယ်နိုင်ခဲ့သော်လည်း ပျောက်ဆုံးနေသည့် ၂၃ ဦးကို ကယ်ဆယ်ရေးအဖွဲ့များက ဆက်လက်ရှာဖွေလျက်ရှိသည်။ စနေနေ့ညနေပိုင်းတွင် တရုတ်ကယ်ဆယ်ရေးသင်္ဘော နန်ဟိုင်ကျူး ၁၁၅ က အဆိုပါသင်္ဘောကို ပထမဆုံးတွေ့ရှိခဲ့ခြင်းဖြစ်ပြီး လက်ရှိတွင် တရုတ်နှင့် ဗီယက်နမ် ရေယာဉ်များ၊ ရဟတ်ယာဉ်များဖြင့် ပူးပေါင်းရှာဖွေလျက်ရှိသည်။ အလျား မီတာ ၇၀ နီးပါးနှင့် တန်ချိန် ၉၉၉ တန်ရှိ အဆိုပါသင်္ဘော နစ်မြုပ်ခဲ့သည့် ဧရိယာမှာ စပရက်တလေ ကျွန်းစုအနီး အငြင်းပွားဖွယ် ရေပြင်အတွင်း တည်ရှိကြောင်း သိရသည်။