ထိုင်းဗဟိုဘဏ်က ရွှေဆိုင်များတွင် ရွှေအရောင်းအဝယ်အတွက် ငွေသားသုံးစွဲမှု ကန့်သတ်ရန် စဉ်းစားနေ

ထိုင်းဗဟိုဘဏ် (BoT) သည် အရောင်းအဝယ်စနစ်များ ပွင့်လင်းမြင်သာမှုရှိစေရန်၊ မသင်္ကာဖွယ် ငွေကြေးစီးဆင်းမှု အန္တရာယ် လျှော့ချရန်နှင့် ဘတ်ငွေလဲလှယ်နှုန်း တည်ငြိမ်စေရန်အတွက် ရွှေဆိုင်များတွင် ရွှေတုံး/ရွှေခဲ အရောင်းအဝယ်ပြုလုပ်ရာ၌ သုံးစွဲသည့် ငွေသားပမာဏကို ကန့်သတ်ရန် ပြင်ဆင်လျက်ရှိသည်။ သာမန်ဝယ်ယူသူများအတွက် တစ်ရက်လျှင် ရွှေဆိုင်တစ်ဆိုင်၌ ဘတ် ၁ သန်းမှ ၁၀ သန်းကြားနှင့် ရွှေကုန်သည် အချင်းချင်းအတွက် ဘတ် ၁၀ သန်းမှ သန်း ၈၀ ကြား ငွေသားသုံးစွဲခွင့်ပြုရန် မူကြမ်းတွင် ပါဝင်ပြီး ယင်းထက် ကျော်လွန်ပါက ဘဏ်စနစ်သုံး ငွေပေးချေမှုများကိုသာ သုံးစွဲရမည်ဖြစ်သည်။ ပြင်ပရွှေဆိုင်များတွင် ငွေသားဖြင့် တိုက်ရိုက်ဝယ်ယူမှုများကို ပိုမို ထိန်းချုပ်စိစစ်နိုင်ရန်အတွက် အဆိုပါ စည်းမျဉ်းအသစ်ကို တိုးချဲ့ပြဋ္ဌာန်းရန် ပြင်ဆင်လာခြင်းဖြစ်ကြောင်း သိရသည်။