မန္တလေးတိုင်း၊ ချမ်းမြသာစည်မြို့နယ်၌ ရွှေဆိုင်တစ်ဆိုင် သေနတ်ပြ ဓားပြတိုက်ခံရပြီး ရွှေတစ်ပိဿာခန့် ပါသွား

မန္တလေးမြို့၊ ချမ်းမြသာစည်မြို့နယ်၊ လမ်း ၁၁၀ (၆၂ လမ်းနှင့် ၆၄ လမ်းကြား) ရှိ မီလျံနာရွှေဆိုင်တွင် ဇူလိုင်လ ၂၀ ရက် ညနေ ၃ နာရီကျော်က သေနတ်ပြ ဓားပြတိုက်မှု ဖြစ်ပွားခဲ့ကြောင်း မန္တလေးတိုင်းဒေသကြီး ရဲတပ်ဖွဲ့ထံမှ သိရသည်။အမျိုးသား ၆ ဦးသည် ဆိုင်ကယ် ၃ စီးဖြင့် ရောက်ရှိလာပြီး ဆိုင်အတွင်း ဝင်ရောက်ကာ သေနတ်ပြ ခြိမ်းခြောက်၍ ရွှေတစ်ပိဿာခန့်ကို ယူဆောင်ကာ မနော်ဟရီလမ်းအတိုင်း ဆိုင်ကယ်များဖြင့် မောင်းနှင်ထွက်ပြေးသွားခဲ့ခြင်း ဖြစ်သည်။ ဓားပြတိုက်ခံရမှုအတွင်း ဆိုင်ဝန်ထမ်းတစ်ဦး ထိခိုက်ဒဏ်ရာရရှိခဲ့ပြီး လက်ရှိတွင် လုံခြုံရေးတပ်ဖွဲ့ဝင်များက အခင်းဖြစ်နေရာ၌ စစ်ဆေးမှုများပြုလုပ်ကာ ထွက်ပြေးသွားသည့် တရားခံများကို ဖမ်းဆီးရမိရေး စုံစမ်းရှာဖွေနေကြောင်း သိရသည်။