ပြည်ပသို့ ထွက်ခွာသူများတွင် အထက်တန်းနှင့် တက္ကသိုလ်အဆင့် ပညာတတ် ရွှေ့ပြောင်းလုပ်သားများ ပိုမိုများပြားလာ

၂၀၁၉ နှင့် ၂၀၂၄ သန်းခေါင်စာရင်း အချက်အလက်များအရ မြန်မာနိုင်ငံမှ ပြည်ပသို့ ထွက်ခွာသူများတွင် မူလတန်းနှင့် အလယ်တန်းအဆင့် လျော့နည်းသွားပြီး အထက်တန်းနှင့် တက္ကသိုလ်/ဘွဲ့ရအဆင့် ပညာတတ်လူငယ်များ ထွက်ခွာမှု အချိုးအစား ပိုမိုမြင့်မားလာကြောင်း တွေ့ရှိရသည်။အထက်တန်းအဆင့် ထွက်ခွာသူမှာ ၁၅ ရာခိုင်နှုန်းမှ ၂၂ ရာခိုင်နှုန်းသို့လည်းကောင်း၊ တက္ကသိုလ်/ကောလိပ်အဆင့်မှာ ၂ ရာခိုင်နှုန်းမှ ၄ ရာခိုင်နှုန်းသို့လည်းကောင်း၊ ဘွဲ့ရအမျိုးသမီး ထွက်ခွာသူမှာ ၆ ရာခိုင်နှုန်းမှ ၈ ရာခိုင်နှုန်းသို့လည်းကောင်း အသီးသီး တိုးတက်လာခဲ့တာ ဖြစ်သည်။ ယင်းသို့ အခြေခံလုပ်သားများထက် ကျွမ်းကျင်လုပ်သားနှင့် ပညာတတ်များ ပိုမိုထွက်ခွာလာခြင်းသည် ပြည်တွင်း၌ ဦးနှောက်ယိုစီးမှု (Brain Drain) စိန်ခေါ်မှုကို ပိုမိုကြီးမားလာစေကြောင်း သိရသည်။