စပိန်ကြယ်ပွင့် ယာမားလ် ယူရိုနှင့် ကမ္ဘာ့ဖလားချန်ပီယံဆုကို ဆယ်ကျော်သက်အရွယ်ဖြင့် ရယူနိုင်သည့် ပထမဆုံးကစားသမားအဖြစ် မှတ်တမ်းဝင်

စပိန်အသင်း၏ တိုက်စစ်ကစားသမား လာမင်း ယာမားလ် (Lamine Yamal) သည် ယူရိုနှင့် ကမ္ဘာ့ဖလား ချန်ပီယံဆုနှစ်ခုစလုံးကို ဆယ်ကျော်သက်အရွယ်ဖြင့် ဆွတ်ခူးနိုင်သည့် သမိုင်းတစ်လျှောက် ပထမဆုံးသော ကစားသမားအဖြစ် စံချိန်သစ်တင်ခဲ့သည်။ ယာမားလ်သည် ယူရို-၂၀၂၄ ချန်ပီယံဆုကို အသက် ၁၇ နှစ်အရွယ်ဖြင့် လည်းကောင်း၊ ယခု ၂၀၂၆ ကမ္ဘာ့ဖလားချန်ပီယံဆုကို အသက် ၁၉ နှစ်အရွယ်ဖြင့် လည်းကောင်း ဆယ်ကျော်သက်အရွယ်အတွင်းမှာပင် ပိုင်ဆိုင်ခဲ့ခြင်း ဖြစ်သည်။ ၎င်းသည် လက်ရှိသက်တမ်းအတွင်း စပိန်အသင်းနှင့် ဆုဖလား ၂ လုံး၊ ဘာစီလိုနာအသင်းနှင့် ဆုဖလား ၆ လုံးအထိ ရရှိထားပြီဖြစ်သည်။၂၀၂၆ ကမ္ဘာ့ဖလားရရှိခဲ့သည့် စပိန်အသင်းတွင် ဆယ်ကျော်သက်ကစားသမားနှစ်ဦး ပါဝင်ခဲ့ရာ နောက်ခံလူ ကူဘာဆီ (Pau Cubarsí) လည်း ပါဝင်ခဲ့ပြီး ၎င်းက ပြိုင်ပွဲ၏ အကောင်းဆုံးလူငယ်ကစားသမားဆုကိုပါ ဆွတ်ခူးနိုင်ခဲ့သည်။ သို့သော် ကူဘာဆီသည် ယူရို-၂၀၂၄ ပြိုင်ပွဲတွင် ရွေးချယ်ခံခဲ့ရခြင်းမရှိသဖြင့် ယာမားလ်ကဲ့သို့ စံချိန်မျိုးနှင့် လွဲချော်ခဲ့ရသည်။ စပိန်အသင်းသည် ယခုကမ္ဘာ့ဖလားပြိုင်ပွဲ ၁၆ သင်းအဆင့်တွင် ပေါ်တူဂီကိုလည်းကောင်း၊ ဗိုလ်လုပွဲတွင် အာဂျင်တီးနားကိုလည်းကောင်း ကျော်ဖြတ်ခဲ့ရသဖြင့် ယာမားလ်အနေဖြင့် ကမ္ဘာ့အကောင်းဆုံးကစားသမားများဖြစ်ကြသည့် စီရော်နယ်လ်ဒိုနှင့် မက်ဆီတို့ကို အနိုင်ယူကာ ချန်ပီယံဆုဖလား ရယူနိုင်ခဲ့ခြင်းဖြစ်ကြောင်းလည်း တင်စားပြောဆိုနေကြသည်။