စင်ကာပူ၌ ရေဆိုးမြောင်းအဖုံးဖွင့်ရင်း ရုတ်တရက် မီးလောင်မှုဖြစ်ပွားခဲ့ကာ အလုပ်သမား နှစ်ဦး ဒဏ်ရာရ

စင်ကာပူနိုင်ငံ ကလန်းလမ်း (Kallang Road) ရှိ လုပ်ငန်းခွင်တစ်ခုတွင် လူသွားလမ်းဘေး မင်ဟိုး (Manhole) ရေဆိုးထုတ်မြောင်းအဖုံး ဖွင့်လှစ်ပြင်ဆင်ရာမှ ရုတ်တရက် ဝုန်းကနဲ မီးလောင်မှု (Flash Fire) တစ်ခု ဖြစ်ပွားခဲ့ပြီး အလုပ်သမား နှစ်ဦး ဒဏ်ရာရရှိခဲ့မှုကြောင့် စင်ကာပူ လူအင်အားဝန်ကြီးဌာန (MOM) က သက်ဆိုင်ရာ ကန်ထရိုက်တာ၏ မင်ဟိုးအဖုံး ဖွင့်လှစ်ခြင်းဆိုင်ရာ လုပ်ငန်းအားလုံးကို ချက်ချင်းရပ်ဆိုင်းရန် အမိန့်ထုတ်ပြန်လိုက်သည်။အဆိုပါ မတော်တဆမှုသည် ယမန်နေ နံနက်ပိုင်းတွင် ဖြစ်ပွားခဲ့ခြင်းဖြစ်ပြီး၊ အသက် ၂၆ နှစ်နှင့် ၃၃ နှစ်အရွယ်ရှိ ဘင်္ဂလားဒေ့ရှ်နိုင်ငံသား အလုပ်သမားနှစ်ဦးသည် မင်ဟိုးအဖုံးကို ဖွင့်ရန် ကြိုးပမ်းနေစဉ်အတွင်း မြေအောက်အပေါက်ဝမှ ရုတ်တရက် မီးတောက် ပွင့်ထွက်လာခဲ့ခြင်း ဖြစ်သည်။ ၎င်းတို့နှစ်ဦးစလုံးသည် မီးလောင်ဒဏ်ရာများ ရရှိခဲ့သောကြောင့် စင်ကာပူအထွေထွေရောဂါကုဆေးရုံကြီး (SGH) သို့ ပို့ဆောင်ကာ ကုသမှုပေးလျက်ရှိသည်။MOM ၏ ကနဦး စုံစမ်းစစ်ဆေးချက်များအရ မြေအောက်မြောင်းအတွင်း စုဆောင်းနေသည့် လောင်စာဆီဓာတ်ငွေ့များ (Flammable Gases) ကြောင့် ယခုကဲ့သို့ မီးလောင်မှုဖြစ်ပွားရခြင်း ဖြစ်နိုင်ကြောင်း သုံးသပ်ထားပြီး၊ လုပ်ငန်းခွင်ဘေးအန္တရာယ်ကင်းရှင်းရေး စည်းမျဉ်းများကို လိုက်နာမှု ရှိ၊ မရှိ ဆက်လက်စစ်ဆေးလျက်ရှိသည်။ စင်ကာပူအာဏာပိုင်များက လုပ်ငန်းခွင်အတွင်း မြေအောက်ကျဉ်းကျပ်သော နေရာများတွင် အလုပ်မလုပ်မီ ဓာတ်ငွေ့စစ်ဆေးမှုများကို စနစ်တကျ ပြုလုပ်ရန် ကန်ထရိုက်တာအားလုံးကို အလေးအနက် သတိပေးထားသည်။