အမေရိကန်ပြည်ထောင်စုသို့ တင်ပို့မည့် ကုန်သွယ်ရေးဆိုင်ရာ စိန်ခေါ်မှုများနှင့် ဝယ်လိုအား ကျဆင်းမှုများ ကြုံတွေ့နေရချိန်တွင် တရုတ်နိုင်ငံ၏ ပုစွန်ဝယ်လိုအား ဆက်တိုက်မြင့်တက်လာခြင်းက ဗီယက်နမ် ပုစွန်တင်ပို့သူများအတွက် အခွင့်အလမ်းကောင်းများ ဖန်တီးပေးလျက်ရှိသည်။
ဗီယက်နမ် ရေထွက်ပစ္စည်းထုတ်လုပ်သူများနှင့် တင်ပို့ရောင်းချသူများအသင်း (VASEP) ၏ အဆိုအရ ယခုနှစ် ဇန်နဝါရီလမှ မေလအထိ ဗီယက်နမ်၏ ပုစွန်တင်ပို့မှုမှာ ၁၂ ရာခိုင်နှုန်း မြင့်တက်ခဲ့သည်။ ထိုအထဲတွင် တရုတ်ပြည်မကြီးနှင့် ဟောင်ကောင်စျေးကွက်သို့ တင်ပို့မှုသည် ယခင်နှစ်ကာလတူထက် ၄၆ ရာခိုင်နှုန်းအထိ သိသိသာသာ ခုန်တက်သွားပြီး အမေရိကန်ဒေါ်လာ ၇၁၁ သန်းကျော်အထိ ရရှိခဲ့ရာ ဗီယက်နမ်၏ စုစုပေါင်း ပုစွန်တင်ပို့မှုဝင်ငွေ၏ ၃၈ ရာခိုင်နှုန်းနီးပါး ရှိလာခဲ့သည်။တရုတ်စျေးကွက်တွင် အီကွေဒေါနှင့် အိန္ဒိယတို့က ပမာဏအားဖြင့် အဓိကကြီးစိုးထားသော်လည်း ဗီယက်နမ်အနေဖြင့် တန်ဖိုးမြင့် ရေခဲရိုက်ပုစွန်၊ ပုစွန်ကျားနှင့် ကျောက်ပုစွန် (Lobster) ကဲ့သို့သော ပရီမီယံ ရေထွက်ကုန်များကို ပိုမိုတင်ပို့နိုင်ခဲ့သည်။ ပြီးခဲ့သည့် ၂၀၂၅ ခုနှစ်တွင်လည်း တရုတ်နိုင်ငံသည် ဗီယက်နမ် ပုစွန်များကို အမေရိကန်ဒေါ်လာ ၁.၂၃ ဘီလီယံဖိုးအထိ အများဆုံးဝယ်ယူခဲ့သည့် နိုင်ငံဖြစ်ခဲ့သည်။လက်ရှိတွင် အမေရိကန်စျေးကွက်၌ အခွန်စည်းကြပ်မှုဆိုင်ရာ နောက်ဆုံးသတ်မှတ်ရက်များနှင့် ကုန်သွယ်ရေးဘေးအန္တရာယ်များ ရှိနေသဖြင့် ဗီယက်နမ် ပုစွန်လုပ်ငန်းအနေဖြင့် ၂၀၂၆ ခုနှစ်အတွင်း တရုတ်၊ ဥရောပသမဂ္ဂ (EU) နှင့် CPTPP အဖွဲ့ဝင်နိုင်ငံများကိုသာ အဓိကအားထား တင်ပို့သွားရန် မျှော်လင့်ထားကြသည်။
