ဂျပန်နိုင်ငံရဲ့ အကြီးဆုံး ဓာတ်အားပေးလုပ်ငန်း Jera ဟာ ၂၀၂၈ ခုနှစ်က စပြီး ကာတာနိုင်ငံကနေ သဘာဝဓာတ်ငွေ့ရည် (LNG) ဝယ်ယူဖို့ ရေရှည်သဘောတူညီချက်တစ်ရပ်ကို လက်မှတ်ရေးထိုးခဲ့ပါတယ်။ အဲဒီသဘောတူညီချက်ဟာ မြင့်တက်လာနေတဲ့ လျှပ်စစ်ဓာတ်အားလိုအပ်မှုကို ဖြည့်ဆည်းပေးဖို့အတွက် LNG ကို ပုံမှန်ရရှိစေမှာ ဖြစ်တယ်လို့ Jera က ပြောပါတယ်။ ကာတာရဲ့ နိုင်ငံပိုင်ကုမ္ပဏီ QatarEnergy ဆီကနေ တစ်နှစ်ကို LNG တန်ချိန် ၃ သန်းလောက် ၂၇ နှစ်ကြာ ဝယ်ယူမှာ ဖြစ်တယ်လို့ Jera က အင်္ဂါနေ့မှာ ပြောကြားခဲ့ပါတယ်။ ဒါဟာ ဂျပန်ရဲ့ နှစ်စဉ် LNG သုံးစွဲမှုရဲ့ ၅ ရာခိုင်နှုန်းလောက် ဖြစ်ပါတယ်။ ဝယ်ယူမယ့် ဈေးနှုန်းကိုတော့ Jera က မထုတ်ပြန်ခဲ့ပါဘူး။
