ပြည်တွင်းတွင် နှစ်လနီးပါး  စျေးငြိမ်နေခဲ့သည့် ပြောင်းစျေး ပြန်တက်လာ

ကုန်သည်များ ထိုင်းနိုင်ငံသို့ စတင်ပို့ ရန် ပြင်ဆင်နေကြပြီး ဖြစ်သောကြောင့် နှစ်လနီးပါ စျေးငြိမ်နေခဲ့သည် ပြောင်းစျေး တဖြည်းဖြည်း ပြန်တက်လာကြောင်း စျေးကွက်အရသိရပါသည်။ ယခင်က ဘုရင့်နောင်ကုန်စည်ဒိုင် စျေးကွက်တွင် ပြောင်းတစ်ပိဿာကို ၁,၄၃၀ မှ ၁,၄၅၀ ကျပ် ဖြင့် စျေးငြိမ်နေခဲ့ခြင်းဖြစ်ပြီး ယခု ပြောင်း တစ်ပိဿာလျှင် ၁,၄၇၀ မှ ၁,၄၉၀ အထိ ပြန်လည် အရောင်းဝယ်ဖြစ်လာကြောင်း သိရပါသည်။ "ထိုင်းကိုပဲ အား ထား တင်ပို့ကြတာ ။ ကုန်သည်တွေက ဒီ အခွန်လွတ်ကာလကို ပဲ စောင့်နေကြတာ။ အခု တင်ပို့ရမဲ့ကာလ လျော့မယ်လို့ ကြားတယ် ၅လ ပဲ တင်ပို့ခွင့်ပေးမယ် ၊ သတ်မှတ်ထားတဲ့ ကာလ ကျော်ရင် အခွန် ပြန်ကောက်မယ်လို့ သိရတယ်။ ထိုင်းမရတော့လဲ တခြားနိုင်ငံတွေ တင်ပို့ဖို့ ကြိုးစားရမှာပဲ၊ ဒါပေမဲ့ တခြားနိုင်ငံတွေက ထိုင်းလောက် စျေးမရဘူး ''ဟု ကုန်သည်တစ်ဦးက ပြောသည်။ထို့ကြောင့် ထိုင်းအပြင် ဖိလစ်ပိုင် ၊ အိန္ဒိယ အစရှိသည့် နိုင်ငံများကို တင်ပို့နိုင်ရန် ကြိုးစားမည်ဖြစ်ကြောင်းလည်း သိရပါသည်။