ပုဂံဒေသသို့ နယ်မြေအခြေအနေအရ လာရောက်လည်ပတ်သူနည်းပါးနေ

ယခုရက်ပိုင်းကာလအတွင်းတွင် ပုဂံရှေးဟောင်းယဉ်ကျေးမှုနယ်မြေဒေသသို့ နယ်မြေအခြေအနေအရ လာရောက်လည်ပတ်သူ နည်းနေသေးကြောင်း ဒေသခံများကြားမှ သိရသည်။လမ်းခရီးလုံခြုံရေးအပေါ် စိုးရိမ်မှုများနှင့် သွားလာရခက်ခဲမှုများကြောင့် လာရောက်လည်ပတ်သူသိသိသာသာလျော့နည်း နေကြခြင်းလည်းဖြစ်ကြောင်း ဆိုကြသည်။"ဟိုတယ်တွေမှာလည်း လူသိပ်မရှိဘူး၊ ပုဂံမြို့သစ်ဖက်မှာဆို တည်းတဲ့သူ လုံးဝကိုမရှိသလောက်ပဲ၊ တစ်ခါမှ ဒီလောက်လူနည်းတာမျိုးမတွေ့ဖူးသေးဘူး"ဟု ညောင်ဦးမြို့ခံတစ်ဦးက ပြောသည်။ယခုကာလတပို့တွဲလပြည့် ရုံးပိတ်ရက်အတွင်း ပုဂံဒေသသို့လာရောက်လည်ပတ်သူ ၁၀၀ ကျော်သာရှိပြီး ည ၈ နာရီ နောက်ပိုင်း လုံခြုံရေးအခြေအနေအရ အပြင်ထွက်လည်ပတ်သူမရှိတော့ကြောင်း ဒေသခံများကဆိုသည်။လမ်းခရီးသွားလာရခက်ခဲမှုအပြင် ပြန်ပေးဆွဲမှုကဲ့သို့သော ဖြစ်ရပ်အချို့ဖြစ်ပွားလာမှုများကြောင့် ပုဂံဒေသသို့ ခရီးသွားဝင်ရောက်မှုလျော့နည်းခဲ့ခြင်းဖြစ်ပြီးလာမည့် ဖေဖော်ဝါရီလလယ်ပိုင်း ရက်ရှည်ရုံးပိတ်ရက်ကာလတွင်မူ ခရီးသွားဝင်ရောက်မှု ပြန်လည်မြင့်တက်လာရန် မျှော်လင့်နေကြကြောင်း ဒေသခံများထံမှ သိရသည်။