အာဆင်နယ်အသင်းနည်းပြ အာတေတာက လိဂ်ဖလား ဆီမီးဖိုင်နယ်တွင် ချယ်လ်ဆီးအသင်းကို နှစ်ကျော့ပေါင်း ၄-၂ ဂိုးဖြင့် အနိုင်ယူကာ ဗိုလ်လုပွဲသို့ တက်ရောက်နိုင်ခဲ့ခြင်းသည် ပွဲကျပ်များကြားတွင် ပင်ပန်းနေသော အသင်းအတွက် အကောင်းဆုံး ဗီတာမင် (အားဆေး) ဖြည့်သွင်းလိုက်သကဲ့သို့ပင် ဖြစ်ကြောင်း ပြောကြားခဲ့သည်။ အာတေတာသည် အာဆင်နယ်ကို ကိုင်တွယ်သည့် ၆ နှစ်တာကာလအတွင်း ဒုတိယအကြိမ်မြောက် ဗိုလ်လုပွဲသို့ ပို့ဆောင်ပေးနိုင်ခဲ့ခြင်းဖြစ်ပြီး လာမည့် မတ်လ ၂၂ ရက်တွင် ကျင်းပမည့် ဗိုလ်လုပွဲ၌ မန်စီးတီး သို့မဟုတ် နယူးကာဆယ်အသင်းနှင့် ရင်ဆိုင်ရမည်ဖြစ်သည်။ ၃ ရက်တစ်ပွဲ ကစားနေရသည့် အခြေအနေတွင် ယခုကဲ့သို့ ဗိုလ်လုပွဲတက်နိုင်ခြင်းက ကစားသမားများအတွက် စိတ်ဓာတ်ခွန်အား အဆပေါင်းများစွာ တိုးတက်စေသည့် "မှော်ဆန်သော အခိုက်အတန့်" ဖြစ်ကြောင်းလည်း ၎င်းက ထပ်လောင်းပြောကြားခဲ့သည်။
