ရန်ကုန်မြို့ရှိ ရပ်ကွက်များအတွင်းလုယက်မှုကြောင့် ကလေးငယ်များရွှေထည်ဝတ်ဆင်မပေးရန် သတိပေးမှုများရှိနေ

ရန်ကုန်မြို့ရှိ ရပ်ကွက်များအတွင်း လုယက်မှုမျိုးစုံအဖြစ်များလာသဖြင့် ကလေးငယ်များကို ရွှေထည်လက်ဝတ်တန်ဆာများ၊ တန်ဖိုးရှိပစ္စည်းများ ဝတ်ဆင်မပေးရန် ရပ်ကွက်အချို့တွင် အချင်းချင်းသတိပေးမှုများရှိနေပြီး လူမှုကွန်ရက်တွင်လည်း သတိပေးမျှဝေမှုများလည်း ရှိလာခဲ့သည်။ပြီးခဲ့သည့် ရက်ပိုင်းကလည်း ရွှေပြည်သာမြို့နယ်(၁၃)ရပ်ကွက်တွင် ဆော့ကစားနေသည့် အသက် ၇ နှစ်အရွယ် ကလေးငယ်တစ်ဦးကို ရိုက်နှက်ကာ ရွှေလက်ကောက်လုယက်မှုဖြစ်ပွားခဲ့ကြောင်း ရပ်ကွက်နေပြည်သူများက ပြောသည်။ထို့ပြင် တစ်ရက်လျှင် လူဦးရေ ၁၅ သိန်းဝန်းကျင်စီးနင်းနေသည့် YBS ဘတ်စ်ကားများပေါ်တွင်လည်း ခါးပှိုက်နှိုက်ခံရမှုများ ပိုမိုဖြစ်ပွားလာသဖြင့် သွားလာရာတွင်မပေါ့ဆဘဲ အထူးသတိထားသွားလာကြရန် သတိပေးမှုများ ရှိနေကြသည်။