ထိုင်းရောက် ရွှေ့ပြောင်း မြန်မာ ကလေးငယ်များ အထောက်အထား မရှိလည်း ကျောင်းတက်ခွင့်ရမည်

ထိုင်းနိုင်ငံအတွင်းရှိ အထောက်အထားမရှိသူများနှင့် နိုင်ငံသားဖြစ်ခွင့်မရသေးသူများ၏ ကလေးငယ်များ ပညာသင်ကြားခွင့်မဆုံးရှုံးစေရန် ရည်ရွယ်သည့် လမ်းညွှန်ချက်အသစ်ကို ထိုင်းပညာရေးဝန်ကြီးဌာနက ဇန်နဝါရီ ၃၀ ရက်တွင် တော်ဝင်ပြန်တမ်း၌ တရားဝင်ထုတ်ပြန်ကြေညာခဲ့သည်။ အဆိုပါမူဝါဒသစ်အရ စာသင်ကျောင်းများအနေဖြင့် စာရွက်စာတမ်းမစုံလင်သည့် ကလေးငယ်များကို လက်ခံရန် ငြင်းပယ်ခွင့်မရှိဘဲ ၎င်းတို့အတွက် 'G' အက္ခရာဖြင့်စသည့် ဂဏန်း ၁၃ လုံးပါ G Code စနစ် ကို အသုံးပြု၍ ကျောင်းအပ်လက်ခံရမည်ဖြစ်သည်။ ထို့ပြင် ကျောင်းအုပ်ချုပ်သူများက မိဘများနှင့်ပူးပေါင်းကာ ကလေးများအတွက် တရားဝင်မှတ်ပုံတင်နံပါတ်ရရှိရေး ကူညီဆောင်ရွက်ပေးရမည်ဖြစ်ပြီး၊ ကျောင်းပြီးသည့်တိုင် မှတ်ပုံတင်မရရှိသေးပါကလည်း မူလ G Code ကို ဆက်လက်အသုံးပြုခွင့်ပေးထားမည်ဖြစ်သည်။ ဤအစီအစဉ်သည် ထိုင်းရောက် မြန်မာရွှေ့ပြောင်းလုပ်သားများ၏ ကလေးငယ်များအတွက် ပညာရေးအခွင့်အလမ်းသစ်များ ရရှိလာစေမည်ဖြစ်ကြောင်းသိရှိရပါသည်။