ထိုင်းဝန်ကြီးချုပ်က ကိုဗစ် ၁၉ ကပ်ရောဂါ ကာလတုန်းကလို Nipah ဗိုင်းရပ်စ်ကို စစ်ဆေးနေတယ်လို့ ပြော

အိန္ဒိယနိုင်ငံတွင် ဖြစ်ပွားနေသည့် နီပါးဗိုင်းရပ်စ် (Nipah virus) ကြောင့် ထိုင်းနိုင်ငံအတွင်းသို့ ရောဂါကူးစက်မှုမရှိစေရန် ကိုဗစ်-၁၉ ကပ်ရောဂါကာလက ကျင့်သုံးခဲ့သည့် စစ်ဆေးရေးလုပ်ငန်းစဉ်များအတိုင်း တိုးမြှင့်စောင့်ကြည့်ရန် ဝန်ကြီးချုပ် Anutin Charnvirakul က ဇန်နဝါရီ ၂၅ ရက်တွင် ညွှန်ကြားလိုက်သည်။ အဆိုပါဗိုင်းရပ်စ်သည် လေထဲမှတစ်ဆင့် မကူးစက်ဘဲ ခန္ဓာကိုယ်ထွက်အရည်များနှင့် ထိတွေ့ရာမှသာ ကူးစက်တတ်သဖြင့် အစားအစာကို ပူနွေးစွာစားသုံးခြင်း၊ လက်ဆေးခြင်းနှင့် လူချင်းအနီးကပ်ထိတွေ့မှု လျှော့ချခြင်းစသည့် တစ်ကိုယ်ရေသန့်ရှင်းရေး အလေ့အကျင့်များကို လိုက်နာကြရန် တိုက်တွန်းထားသည်။ လက်ရှိတွင် ထိုင်းနိုင်ငံ၌ ကူးစက်ခံရသူ မရှိသေးသော်လည်း ရောဂါဖြစ်ပွားမှုနှုန်းမြင့်မားသည့် နိုင်ငံများမှ လာရောက်သော ခရီးသွားများကို လေဆိပ်များ၌ ပိုမိုတင်းကျပ်စွာ စစ်ဆေးသွားမည်ဖြစ်ကြောင်းနှင့် ပြည်သူများ စိုးရိမ်ထိတ်လန့်မှုမရှိစေရန် သတင်းအချက်အလက်များကို အချိန်နှင့်တစ်ပြေးညီ ထုတ်ပြန်ပေးသွားမည်ဖြစ်ကြောင်း သိရှိရပါသည်။