ရေလွှမ်းမိုးမှုများနှင့် ရင်ဆိုင်နေရသော မိုဇမ်ဘစ်နိုင်ငံ၌ ရေမြုပ်နေသော မြို့ရွာများအတွင်းသို့မိကျောင်းများ ဝင်ရောက်လာမှုပြဿနာကိုလည်းဒေသခံများ ရင်ဆိုင်နေကြရကြောင်း ဇန်နဝါရီ ၂၃ရက် သတင်းများတွင် ရေးသားတင်ပြထားသည်။မိုဇမ်ဘစ်အာဏာပိုင်များ၏ အဆိုအရပြီးခဲ့သည့် ရက်များအတွင်း ရေဘေးကာလအတွင်းသေဆုံးသူအရေအတွက်မှာ ၁၃ ဦးရှိပြီး သုံးဦးမှာမိကျောင်းများ၏ တိုက်ခိုက်မှုကြောင့် သေဆုံးခဲ့ရသူများဖြစ်ကြောင်း သိရသည်။ ဂါဇာပြည်နယ်၏မြို့တော်ဖြစ်သော ရှီ-ရှီမြို့၌ မိကျောင်းအန္တရာယ်သတိပေးချက်များကို မိုဇမ်ဘစ် တာဝန်ရှိသူများကထုတ်ပြန်ထားသည်။ ဂါဇာပြည်နယ်သည် ရေဘေးဒဏ်ကို အပြင်းထန်ဆုံး ခံစားနေရသည့် ဒေသများထဲတွင် တစ်ခုအပါအဝင်ဖြစ်ကြောင်း မိုဇမ်ဘစ်တာဝန်ရှိသူများက ပြောကြားသည်။လင်ပိုပိုမြစ်ရေများမြို့ရွာများအတွင်းသို့ဝင်ရောက်လာချိန်တွင်ယင်းမြစ်အတွင်းရှိမိကျောင်းများသည်လည်း မြို့ရွာများအတွင်းသို့ရောက်ရှိလာကြောင်း၊ သို့ဖြစ်ရာ နယ်ခံပြည်သူများအနေဖြင့် မိကျောင်းအန္တရာယ် သတိထားကြရန်သတိပေးချက် ထုတ်ပြန်ထားသည်။မိကျောင်းများ၏ တိုက်ခိုက်မှုကြောင့် ယခုလအစောပိုင်းတွင် ဂါဇာပြည်နယ်၌ နှစ်ဦးသေဆုံး၍သုံးဦး ဒဏ်ရာများရခဲ့ပြီး မာပူတိုပြည်နယ်၌လူတစ်ဦး မိကျောင်းဆွဲခံခဲ့ရသည်။လင်ပိုပိုမြစ်သည် တောင်အာဖရိကနိုင်ငံမှမိုဇမ်ဘစ်ကို ဖြတ်သန်း၍ အိန္ဒိယသမုဒ္ဒရာအတွင်းစီးဝင်နေသောမြစ်ဖြစ်သည်။
