ထိုင်းနိုင်ငံတွင် မျောက်ကျောက်ရောဂါဖြစ်ပွားသူ ၁,၀၀၀ ခန့်ရှိလာပြီး ဘန်ကောက်မြို့၌ ကူးစက်မှုအများဆုံးဖြစ်နေ

ထိုင်းနိုင်ငံတွင် ၂၀၂၂ ခုနှစ်မှ စတင်၍ ယခုအချိန်အထိ မျောက်ကျောက်ရောဂါ ဖြစ်ပွားသူဦးရေ ၁,၀၀၀ ခန့်အထိ ရှိလာပြီဖြစ်ကြောင်းနှင့် အဆိုပါအရေအတွက်ထဲတွင် ဘန်ကောက်မြို့၌ ကူးစက်မှုအများဆုံးဖြစ်ကြောင်း အစိုးရဒုတိယပြောရေးဆိုခွင့်ရှိသူ Airin Phanrit ၏ ပြောကြားချက်ကို ကိုးကား၍ ဖော်ပြထားပါသည်။ ရောဂါထိန်းချုပ်ရေးဌာန (DDC) ၏ အချက်အလက်များအရ ၂၀၂၅ ခုနှစ် စက်တင်ဘာလအထိ အတည်ပြုလူနာ ၉၃၃ ဦးနှင့် သေဆုံးသူ ၁၃ ဦးရှိခဲ့ရာမှ ယခုအခါ ကူးစက်မှုနှုန်း ဆက်လက်မြင့်တက်လာခြင်းဖြစ်ပြီး၊ လူနာအများစုမှာ မရင်းနှီးသူများနှင့် လိင်ဆက်ဆံမှုရာဇဝင်ရှိကြကြောင်း သိရပါသည်။ ထို့ကြောင့် အထူးသဖြင့် လူစည်ကားသော ခရီးသွားနေရာများတွင် အရေပြားအဖုအပိမ့် သို့မဟုတ် အရည်ကြည်ဖုရှိသူများနှင့် နီးကပ်စွာထိတွေ့ခြင်းကို ရှောင်ကြဉ်ရန် အာဏာပိုင်များက သတိပေးနှိုးဆော်ထားပါသည်။