ပရီးမီးယားလိဂ် ပွဲ ၁၀၀ ပြည့်တဲ့ တတိယမြောက် ဂျပန်ကစားသမားအဖြစ် မီတိုမာ မှတ်တမ်းဝင်

ဘရိုက်တန်အသင်း၏ တောင်ပံတိုက်စစ်ကစားသမား မီတိုမာသည် ဘုန်းမောက်အသင်းနှင့် တစ်ဂိုးစီသရေကျခဲ့သည့် ပွဲစဉ်တွင် ပါဝင်ကစားခဲ့ပြီးနောက် ပရီးမီးယားလိဂ်ပွဲပေါင်း ၁၀၀ ပြည့်မြောက်သည့် တတိယမြောက် ဂျပန်နိုင်ငံသားကစားသမားအဖြစ် မှတ်တမ်းဝင်သွားခဲ့ပြီ ဖြစ်ပါသည်။ မီတိုမာ၏ ရှေ့တွင် ဆောက်သမ်တန်နောက်ခံလူဟောင်း ယိုရှီဒါ (၁၅၄ ပွဲ) နှင့် လက်စတာတိုက်စစ်မှူးဟောင်း အိုကာဇာကီ (၁၁၄ ပွဲ) တို့သာ ရှိတော့ပြီး၊ မီတိုမာသည် ၎င်း၏ ပရီးမီးယားလိဂ်ခရီးလမ်းတစ်လျှောက် ၁၀၀ ပွဲကစားရာတွင် ၂၂ ဂိုးအထိ သွင်းယူပေးထားနိုင်ခဲ့သည်။ ၂၀၂၁ ခုနှစ်က ကာဝါဆာကီဖရွန်တေးအသင်းမှ ပြောင်းရွှေ့ကြေး ပေါင် ၂.၇ သန်းဖြင့် ရောက်ရှိလာခဲ့သည့် ၎င်းသည် ဘယ်လ်ဂျီယံကလပ်တွင် အငှားသွားရောက်ကစားခဲ့ပြီးနောက် ဘရိုက်တန်သို့ ပြန်လည်ရောက်ရှိချိန်မှစ၍ အသင်း၏ အဓိကကစားသမားအဖြစ် ခြေစွမ်းပြသကာ ယခုကဲ့သို့ ဂုဏ်ထူးဆောင်မှတ်တမ်းကို ပိုင်ဆိုင်ခဲ့ခြင်း ဖြစ်ပါသည်။