မလေးရှားရောက် ချင်းဒုက္ခသည်များ သြစတြေးလျနိုင်ငံကို အခြေချနေထိုင်နိုင်ရေး ဩစတေးလျနဲ့ချင်းဒုက္ခသည်အဖွဲ့အစည်းတွေ တွေ့ဆုံဆွေးနွေးခဲ့

မလေးရှားနိုင်ငံရောက် ချင်းဒုက္ခသည်များ သြစတြေးလျနိုင်ငံကို အခြေချနေထိုင်နိုင်ရေး ကိစ္စရပ်တွေနဲ့ ပတ်သက်ပြီး မလေးရှားရောက် ချင်းဒုက္ခသည်အဖွဲ့အစည်းများဖြစ်တဲ့ Alliance Of Chin Refugees ( ACR ) , Chin Refugees Committee (CRC) နှင့် Falam Refugee Organization (FRO) အဖွဲ့စည်းများပူး‌ပေါင်းပြီး သြစတြေးလျနိုင်ငံအထက်လွှတ်တော်အမတ် Senator Dean Smith နဲ့ အထူးအစည်းအဝေး ပြုလုပ်ခဲ့တယ်လို့ ACR က ဇန်နဝါရီလ ၁၉ ရက်နေ့မှာ ထုတ်ပြန်ပါတယ်။အစည်းအဝေးကို ဇန်နဝါရီလ ၁၁ ရက်နေ့ကနေ ၁၃ ရက်နေ့အထိ ကျင်းပခဲ့ပြီး သြစတြေလျားချင်းအဖွဲ့အစည်းမှ ပုဂ္ဂိုလ်တစ်ချို့နဲ့ အခြားတိုင်းရင်းသား မိတ်ဆွေတွေလည်း တက်ရောက်ခဲ့ကြတယ်လို့ ACR ထုတ်ပြန်ချက်အရ သိရပါတယ်။မလေးရှားရောက်ချင်းဒုက္ခသည်တွေ ဩစတေးလျနိုင်ငံသို့ အခြေချနေထိုင်နိုင်ရေးကိစရပ်တွေနဲ့ မိသားစုခေါ်စာများအပါအဝင် ဗီဇာလျှောက်ထားရာမှာ စောင့်ဆိုင်းမှု ကြန့်ကြာလွန်းတဲ့ ကိစ္စတွေကို ဦးစားပေးဆွေးနွေးခဲ့တယ်လို့လည်း ထုတ်ပြန်ချက်အရ သိရပါတယ်။