စားအုန်းဆီကို သတ်မှတ်ရည်ညွှန်းဈေးထက် ၂ ရာခိုင်နှုန်းထက်မပိုသော အမြတ်ဖြင့် ရောင်းချရန် ကြပ်မတ်ဆောင်ရွက်နေ

ရန်ကုန်တိုင်းဒေသကြီးအစိုးရအဖွဲ့အနေဖြင့် စားအုန်းဆီကို လက်လီဈေးကွက်အတွင်း အဆမတန် မြှင့်တင်ရောင်းချမှု မရှိစေရန်နှင့် ဖြစ်သင့်ဖြစ်ထိုက်သည့် ဈေးနှုန်းများဖြင့် ရောင်းချစေရေးအတွက် အနီးကပ်ကြပ်မတ် ဆောင်ရွက်လျက်ရှိကြောင်း တိုင်းဒေသကြီးစီးပွားရေးရာဝန်ကြီး ဦးမျိုးမြင့်အောင်က ပြောကြားလိုက်သည်။ ဒေသအရောက်ဈေးနှုန်းအပေါ် ၂ ရာခိုင်နှုန်းထက်မပိုသော အမြတ်နှုန်းဖြင့်သာ ပြန်လည်ဖြန့်ဖြူးရောင်းချရန် ညွှန်ကြားထားပြီး၊ ဖြန့်ဖြူးရေးကုမ္ပဏီများနှင့် ကိုယ်စားလှယ်များအနေဖြင့် အရေအတွက်၊ ဈေးနှုန်းနှင့် အခြင်အတွယ် မှန်ကန်စွာ ရောင်းချရန်လည်း ဇန်နဝါရီ ၁၅ ရက်က ပြုလုပ်သည့် လုပ်ငန်းညှိနှိုင်းအစည်းအဝေးတွင် တိုက်တွန်းခဲ့သည်။ ယခုတစ်ပတ် (ဇန်နဝါရီ ၁၆ ရက်မှ ၂၂ ရက်အထိ) အတွက် ရန်ကုန်အခြေခံလက်ကားရည်ညွှန်းဈေးမှာ တစ်ပိဿာလျှင် ၆,၁၅၀ ကျပ်ဖြစ်ကြောင်း သိရှိရပါသည်။