အဆိုတော် ရှင်မင်းမြတ်ကို မူဆယ်ပွဲငှားဟုဆိုကာ ကျားဖြန့်ဂိုဏ်းက ပြန်ပေးဆွဲ နှိပ်စက် ငွေညှစ်မှု သိန်း ၃၀၀၀ ကျော် ပါသွား

အဆိုတော် ရှင်မင်းမြတ် (ခ) ကိုအောင်ကျော်စိုးသည် ရှမ်းပြည်နယ်မြောက်ပိုင်း၊ မူဆယ်မြို့သို့ ဖျော်ဖြေရေးပွဲငှားရမ်းသည်ဟု အကြောင်းပြကာ လိမ်လည်ခေါ်ဆောင်ခြင်းခံရပြီးနောက် လက်နက်ကိုင် ၅ ဦးပါဝင်သော ကျားဖြန့် (Online Scam) ဂိုဏ်း၏ ပြန်ပေးဆွဲ၊ ညှဉ်းပန်းနှိပ်စက်ကာ ငွေညှစ်မှုကို ခံခဲ့ရကြောင်း သိရှိရပါသည်။ တရားခံများသည် လေယာဉ်လက်မှတ်နှင့် ဟိုတယ်များ ကြိုတင်စီစဉ်ပေးကာ ယုံကြည်အောင်ပြုလုပ်ခဲ့ပြီး ဇန်နဝါရီလ ၅ ရက်နေ့တွင် ပွဲကျင်းပမည့်နေရာသို့ သွားမည်ဟုဆိုကာ ကားပေါ်တွင် မျက်နှာကို အဝတ်စည်း၍ ဂိုဒေါင်တစ်ခုအတွင်းသို့ ဖမ်းဆီးခေါ်ဆောင်သွားခဲ့ခြင်းဖြစ်သည်။ ၅ ရက်တိုင်တိုင် ချုပ်နှောင်ခံထားရစဉ်အတွင်း လက်ထိပ်ခတ်၍ သေနတ်ဖြင့်ချိန်ကာ ရိုက်နှက်နှိပ်စက်ခြင်း၊ ဝတ်လစ်စလစ်ဗီဒီယိုရိုက်၍ ခြိမ်းခြောက်ခြင်းများ ပြုလုပ်ခဲ့ပြီးနောက် မိသားစုနှင့် နီးစပ်သူများထံမှ ကျပ်သိန်းပေါင်း ၃,၀၀၀ ကျော်နှင့် ယွမ် ၁၀,၀၀၀ ကျော်ကို WeChat Pay နှင့် KPay တို့မှတစ်ဆင့် အဓမ္မလွှဲပြောင်းယူခဲ့ကြသည်။ ဇန်နဝါရီ ၉ ရက်တွင် ဖုန်း၊ ပတ်စပို့နှင့် ပစ္စည်းများအားလုံး အသိမ်းခံရကာ မူဆယ်မြို့ပြင်၌ စွန့်ပစ်ခံခဲ့ရပြီးနောက် လက်ရှိတွင် မန္တလေးမြို့တွင် အမှုဖွင့်တိုင်ကြားထားကာ၊ အနုပညာရှင်များနှင့် နာမည်ကျော်များအနေဖြင့် နယ်စပ်ဒေသများသို့ "ပွဲငှားရမ်းခြင်း" အကြောင်းပြချက်ဖြင့် လိမ်လည်ခေါ်ဆောင်သည့် ထောင်ချောက်များကို အထူးသတိပြုကြရန် ကာယကံရှင်က အသိပေးနှိုးဆော်ထားပါသည်။