မိုင်းရယ်တွင် ငွေကျပ် ဘီလီယံနှင့်ချီ တန်ဖိုးရှိသည့် မူးယစ်ဆေးချက်စက်ရုံနှင့် ဆက်စပ်ဂိုထောင်များ ထပ်မံသိမ်းဆည်းရမိ

ရှမ်းပြည်နယ်(မြောက်ပိုင်း)၊ မိုင်းရယ်မြို့နယ်၊ နားလင်းကျေးရွာအနီးရှိ မူးယစ်ဆေးဝါး အဓိကထုတ်လုပ်ရာ ပတ်ဝန်းကျင်နယ်မြေများ၌ ဇန်နဝါရီလ ၁၅ ရက်တွင် မူးယစ်ဆေးချက်လုပ်သည့် စက်ရုံဂိုထောင်များနှင့် ဆက်စပ်ပစ္စည်းအမြောက်အမြားကို ထပ်မံဖော်ထုတ်သိမ်းဆည်းရမိခဲ့ကြောင်း မြန်မာနိုင်ငံရဲတပ်ဖွဲ့က ထုတ်ပြန်ခဲ့သည်။ သိမ်းဆည်းရမိမှုတွင် အမျိုးအစားစိစစ်ဆဲ အက်ဆစ်ပုံး ၃,၅၀၀ ကျော်၊ ဆေးပြားရိုက်စက် ၉ လုံး၊ Happy Water ထုတ်လုပ်သည့် စက်ရုံဂိုထောင်၊ အက်ဆစ်သိုလှောင်ရုံ ၇ လုံးနှင့် လူနေတဲများ ပါဝင်ပြီး၊ ၎င်းပစ္စည်းများကို စနစ်တကျ ဖျက်ဆီးသွားရန် စီစဉ်နေသည်။ ပြီးခဲ့သည့် ဇန်နဝါရီ ၁၀ ရက်ကလည်း ယခုဒေသတစ်ဝိုက်၌ ငွေကျပ် ၁,၆၂၀ ဘီလီယံတန်ဖိုးရှိ မူးယစ်ဆေးဝါး ပင်ရင်းထုတ်လုပ်ရာနေရာများကို ဖမ်းဆီးရမိခဲ့သဖြင့် ယခုဖြစ်စဉ်သည် မြန်မာနိုင်ငံအတွင်း အကြီးဆုံးသော မူးယစ်ဆေးဝါးနှိမ်နင်းမှုကြီး၏ တစ်စိတ်တစ်ပိုင်းဖြစ်ကာ နယ်မြေရှင်းလင်းရေးများကို ဆက်လက်လုပ်ဆောင်နေကြောင်း သိရှိရပါသည်။