အထွေထွေရွေးကောက်ပွဲ အပိုင်း (၂) တွင် ပြည်ခိုင်ဖြိုးပါတီက ၅၂ နေရာအနက် ၄၄ နေရာ အပြတ်အသတ်အနိုင်ရ

၂၀၂၆ ခုနှစ်၊ ဇန်နဝါရီလ ၁၁ ရက်က ကျင်းပခဲ့သော ပါတီစုံဒီမိုကရေစီအထွေထွေရွေးကောက်ပွဲ အပိုင်း (၂) တွင် မြို့နယ် ၅၂ မြို့နယ်အတွက် ပြည်သူ့လွှတ်တော်ကိုယ်စားလှယ်စာရင်းကို ထုတ်ပြန်ခဲ့ရာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ ကိုယ်စားလှယ် ၄၄ ဦးဖြင့် အများဆုံးအနိုင်ရရှိခဲ့ကြောင်း ပြည်ထောင်စုရွေးကောက်ပွဲကော်မရှင် (UEC) က ဇန်နဝါရီ ၁၅ ရက်တွင် ကြေညာခဲ့သည်။ စစ်ကိုင်း၊ တနင်္သာရီ၊ ပဲခူးနှင့် မန္တလေးတိုင်းဒေသကြီးတို့ရှိ မဲဆန္ဒနယ် ၃၀ လုံးကို USDP က အပိုင်ရရှိခဲ့ပြီး မကွေးတိုင်းတွင် ၈ နေရာ၊ ကယားနှင့် ကချင်ပြည်နယ်တို့တွင်လည်း အများစုအနိုင်ရခဲ့သော်လည်း မွန်ပြည်နယ်၌မူ မွန်ညီညွတ်ရေးပါတီ (MUP) က ၄ နေရာဖြင့် အသာစီးရခဲ့သည်။ လက်ရှိအချိန်ထိ အပိုင်း (၁) နှင့် (၂) စုစုပေါင်း ပြည်သူ့လွှတ်တော်နေရာ ၁၆၈ နေရာတွင် USDP က ၁၄၆ နေရာဖြင့် ရှေ့ဆောင်နေပြီး၊ ကျန်ရှိသည့် မြို့နယ် ၆၃ မြို့နယ်အတွက် ရွေးကောက်ပွဲ အပိုင်း (၃) ကို လာမည့် ဇန်နဝါရီ ၂၅ ရက်တွင် ဆက်လက်ကျင်းပသွားမည်ဖြစ်ကြောင်း သိရှိရပါသည်။