ရန်ကုန်မြို့ Myanmar Xiang He စက်ရုံတွင် လုပ်ခတိုးမြှင့်ရေး တောင်းဆိုမှုအပြီး အလုပ်သမားနှစ်ဦးအား အလုပ်ထုတ်

Myanmar Xiang He အထည်ချုပ် စက်ရုံမှာ လုပ်ခလစာ တိုးမြှင့်ပေးဖို့ တောင်းဆိုခဲ့တဲ့ အလုပ်သမားတွေကို အလုပ်ထုတ်ပြီး သတိပေးလက်မှတ်တိုးခိုင်းခဲ့တယ်လို့ အလုပ်သမားတွေက ပြောပါတယ်။ မေ ၁၆ ရက် ညနေ ငါးနာရီ ဝန်းကျင်မှာ အမျိုးသမီးငယ် အလုပ်သမား ၂ ဦးကို အလုပ်ထုတ်ပြီး ၅ ဦးကို သတိပေးလက်မှတ်တွေ ထိုးခိုင်းခဲ့တာလို့ ပြောပါတယ်။ အလုပ်ထုတ်တာနဲ့ သတိပေးလက်မှတ်ထိုးခိုင်းတာတွေကို အလုပ်သမားရုံးတွေ ပိတ်ချိန် ညနေ ၅ နာရီကျော်မှ စက်ရုံဘက်က ရည်ရွယ်ချက်ရှိရှိ ဆောင်ရွက်ခဲ့တာလို့ ပြောပါတယ်။Myanmar Xiang He အထည်ချုပ် စက်ရုံက ရန်ကုန်မြို့ ၊ မြောက်ဥက္ကလာပမြို့နယ်၊ ရွှေပေါက်ကံ စက်မှုဇုန်၊ အင်းဝလမ်းမှာ ရှိပြီး လုပ်ခလစာတိုးမြှင့်ပေးဖို့ နှစ်စဉ် စုဝေးတောင်းဆိုခဲ့ရတယ်လို့ အလုပ်သမားတွေက ပြောပါတယ်။ လက်ရှိ စက်ရုံနှစ်ရုံပေါင်း အလုပ်သမား ၁၀၀၀ ကျော် လုပ်ကိုင်နေပြီး နိုင်ငံပေါင်း ၃၅ နိုင်ငံကျော်ကို ရောင်းချနေတဲ့ တူရကီနိုင်ငံ အခြေစိုက် Mavi တံဆိပ်အထည်တွေ ချုပ်လုပ်နေပါတယ်။