အင်အားပြင်းထန်ငလျင် ဗဟိုပြုရာ စစ်ကိုင်းမြိုနယ် ရေခါးကျေးရွာတွင် ထိခိုက်ပျက်စီးမှု ကြီးမားစွာ ဖြစ်ပေါ်မှုမရှိသော်လည်း ရေခါးရွာနှင့်ကပ်လျက်တည်ရှိသည့် ကျောက်တာရွာ၌ အိမ်ခြေ ၁၇၅ လုံး ပြိုကျပျက်စီးခဲ့ပြီး သောက်သုံးရေအခက်အခဲမှအစ အကူအညီများစွာ လိုအပ်နေဆဲဖြစ်ကြောင်း သိရှိရသည် ။ရေခါးရွာမှာ စပရူလိုင်းနား စိမ်းပြာရေညှိ ထွက်ရှိရာ ရေခါးအင်းတည်ရှိသည့်ရွာဖြစ်ပြီး ငလျင်ဒဏ်ကြောင့် ရေခါးအင်းတွင် ရေအနက် ၂၂ ပေရှိရာမှ ၂ ပေခန့် လျော့သွားခဲ့ပြီး လက်ရှိတွင် အနက်ပေ ၂၀ နှင့် အင်းအကျယ်အဝန်းမှာ ၁၁၄ ဧက ရှိကြောင်း တာဝန်ရှိသူတစ်ဦးက ပြောကြားခဲ့သည် ။ကျောက်တာကျေးရွာမှာ ငလျင်ဒဏ်ကြောင့် ထန်းပင်တစ်ပင် နှစ်ခြမ်းကွဲသွားသည်ကို မြင်တွေ့ရသည့်ရွာ ဖြစ်ပြီး အိမ်ခြေ ၇၃၃ အိမ်ရှိသည့်အနက် ၁၇၅ လုံး ပြိုကျပျက်စီးခဲ့ခြင်းဖြစ်သည် ။
