၂၀၂၁ ခုနှစ်နောက်ပိုင်း ရန်ကုန်တွင် လမ်းပေါ်အိပ် လမ်းပေါ်နေထိုင်စားသောက်ရသည့် အခြေ အနေ မဲ့သူများ ယခင်ထက် ပိုများလာကြောင်း ပရဟိတလုပ်ဆောင်သူများက ဆိုသည်။နေစရာမဲ့သူအများစုဖြစ်သည့် အဆိုပါလူတန်းစားများမှာ လူစည်ကားသည့် နေရာတစ်ဝိုက်ကို အမှီပြု နေထိုင်ကြပြီး ယခင်က တစ်ဦးချင်းတွေ့ရာမှ ယခုအခါ မိသားစုလိုက်တွေ့လာရကြောင်း ဆိုသည်။လမ်းပေါ်အိပ်လမ်းပေါ်စားရသည့် အများစုမှာနေထိုင်ရန် နေအိမ်မရှိခြင်းနှင့် မိသားစုပဋိပက္ခများကြောင့် လမ်းပေါ်ရောက်လာရခြင်းဖြစ်ကာ ယခုအခါ ကျူးကျော်များဖျက်သိမ်းခြင်းနှင့် စစ်ဘေးကြောင့် ရန်ကုန်သို့ ရှောင်လာကြသူများပါ ပါဝင်လာကြောင်း ပရဟိတလုပ်ဆောင်သူများကဆိုသည်။
