ယူနိုက်တက်အသင်းဟာ ကုန်ကျစရိတ်တွေကို လျှော့ချတဲ့ ဆောင်ရွက်မှုရဲ့ အစိတ်အပိုင်းအဖြစ် နောက်ထပ် ဝန်ထမ်း ၂၀၀ ခန့် လျှော့ချသွားမယ့် အစီအစဉ်ကို ကြေညာခဲ့ပါတယ်။ ယူနိုက်တက်အသင်းဟာ ပြီးခဲ့တဲ့ နွေရာသီကလည်း ဝန်ထမ်းပေါင်း ၂၅၀ ခန့်ကို လျှော့ချမှုတွေ ပြုလုပ်ခဲ့တာပါ။ အခုအချိန်မှာလည်း ပူးတွဲပိုင်ရှင် ဆာဂျင်ရက်ကလစ်ဖ် အသင်းကို ရောက်ရှိလာတာ တစ်နှစ်ပြည့်ပြီးနောက် ရက်ပိုင်းအကြာမှာ နောက်ထပ်ဝန်ထမ်း ၁၅၀ နဲ့ ၂၀၀ ကြားကို လျှော့ချမှုတွေ ပြုလုပ်သွားမှာဖြစ်ပါတယ်။ ပြီးခဲ့တဲ့ တနင်္လာနေ့က ဝန်ထမ်းတွေနဲ့ တွေ့ဆုံခဲ့တာမှာ ယူနိုက်တက်အသင်း CEO ဘာရာဒါက ကလပ်အသင်းရဲ့ အသွင်ပြောင်းရေးအစီအစဉ် အစိတ်အပိုင်းအဖြစ် လျှော့ချမှုတွေ ပြုလုပ်သွားမယ်လို့ အသိပေးခဲ့တာပါ။
