ကရင်ပြည်နယ်အတွင်း တောင်သူများ ဝမ်းစာဖူလုံပြီး ဝင်ငွေတိုးတက်စေရန်နှင့် ပြည်ပသို့ ပိုလျှံတင်ပို့နိုင်ရန်အတွက် ယခု ၂၀၂၆-၂၀၂၇ ဘဏ္ဍာနှစ်တွင် မိုးစပါး ဧက ၄၂၈,၀၀၀ ကျော် စိုက်ပျိုးရန် လျာထားဆောင်ရွက်လျက်ရှိကြောင်း စိုက်ပျိုးရေးဦးစီးဌာနမှ သိရသည်။ လက်ရှိတွင် မိုးစပါး ဧက ၁၈၀,၀၀၀ ကျော် စိုက်ပျိုးပြီးစီးနေပြီဖြစ်ကာ စပါးအထွက်နှုန်းကောင်းမွန်စေရန် စိုက်ပျိုးရေးဦးစီးဌာန ဝန်ထမ်းများက နည်းပညာပေးလုပ်ငန်းများကို မြေပြုပြင်ချိန်မှ ရိတ်သိမ်းချိန်အထိ ကွင်းဆင်းကူညီပေးလျက်ရှိသည်။ ကရင်ပြည်နယ်၌ ပြီးခဲ့သည့်နှစ်ကလည်း မိုးစပါး ဧက ၄ သိန်းကျော် စိုက်ပျိုးခဲ့ပြီး တစ်ဧကလျှင် ပျှမ်းမျှ ၆၉ ဒသမ ၇၈ တင်းအထိ ထွက်ရှိခဲ့ကာ တောင်သူများ မျိုးကောင်းမျိုးသန့် ရရှိစေရေးအတွက်လည်း ဌာနမှ ဆက်လက်ဖြန့်ဖြူးပေးလျက်ရှိကြောင်း သိရသည်။
