စင်ကာပူ၌ ကုန်ကျစရိတ် မြင့်မားမှုကြောင့် ကိုယ်ပိုင်ကား စီးရေ အနိမ့်ဆုံးသို့ ကျဆင်းပြီး အငှားကား အရေအတွက် စံချိန်တင် မြင့်တက်

စင်ကာပူနိုင်ငံတွင် ကားဝယ်ယူခွင့် လက်မှတ် (COE) ဈေးနှုန်းများနှင့် ထိန်းသိမ်းစရိတ်များ မြင့်မားလာခြင်းကြောင့် ကိုယ်ပိုင်ကား အရေအတွက်သည် ၂၀၁၉ ခုနှစ်နောက်ပိုင်း အနိမ့်ဆုံးအဆင့်သို့ ကျဆင်းသွားခဲ့ပြီး အခြားတစ်ဖက်တွင် အငှားကား (Private-hire Cars) အရေအတွက်မှာ စံချိန်တင် မြင့်တက်လာခဲ့သည်။စင်ကာပူ ကုန်းလမ်းပို့ဆောင်ရေး အာဏာပိုင်အဖွဲ့ (LTA) ၏ ကိန်းဂဏန်းများအရ စီးပွားရေးလုပ်ငန်းသုံး မဟုတ်သည့် ကိုယ်ပိုင်ကား အရေအတွက် လျော့နည်းသွားသော်လည်း Grab နှင့် Gojek ကဲ့သို့သော အွန်လိုင်း အငှားကား လုပ်ငန်းများ၌ အသုံးပြုသည့် ကားများအပြင် ကားငှားရမ်းသည့် လုပ်ငန်းသုံး မော်တော်ယာဉ် အရေအတွက်မှာ သိသိသာသာ တိုးတက်လာခဲ့သည်။ ယင်းအခြေအနေသည် ပြည်သူများအနေဖြင့် ကိုယ်ပိုင်ကား ပိုင်ဆိုင်ခြင်းထက် ကုန်ကျစရိတ် ပိုမိုသက်သာသည့် အငှားကားများနှင့် အများပြည်သူ ပို့ဆောင်ရေးစနစ်များကို ပိုမိုပြောင်းလဲ အသုံးပြုလာကြကြောင်း ထင်ဟပ်ပြသနေသည်။