ရန်ကုန်မြို့တွင် ကုန်ဈေးနှုန်းများ အဆမတန် မြင့်တက်လာမှုကြောင့် ဈေးခြင်းတစ်ခြင်းလျှင် ကျပ် ၅၀,၀၀၀ ကျော်အထိ ကုန်ကျနေပြီး ဝင်ငွေနည်း မိသားစုများအနေဖြင့် ထမင်းနပ်မှန်ရေးအတွက် အနိုင်နိုင် ရုန်းကန်နေကြရသည်။တစ်နေ့လျှင် ကျပ် ၁၅,၀၀၀ မှ ၂၀,၀၀၀ ဝန်းကျင်သာ ဝင်ငွေရှိသည့် အိမ်ထောင်စုများအနေဖြင့် မိသားစု ၃ ဦးစာ ထမင်းစရိတ် သီးသန့်ပင် တစ်နေ့လျှင် ကျပ် ၂၀,၀၀၀ ခန့် ကုန်ကျနေသည်။ ထို့ကြောင့် ကုန်ကျစရိတ် မျှတစေရန်အတွက် ဟင်းနှစ်မျိုး စားမည့်အစား တစ်မျိုးတည်း ပြောင်းလဲစားသောက်ရခြင်း၊ အသီးအရွက်များဖြင့်သာ ဖြည့်ဆည်း စားသောက်ရခြင်းများ ပြုလုပ်နေကြရသည်။ထို့ပြင် အပိုဝင်ငွေ မရှိသည့်အတွက် အသီးအနှံနှင့် သရေစာ မုန့်များကို ဝယ်ယူစားသောက်နိုင်ခြင်း မရှိတော့ဘဲ လက်ရှိတွင် ပန်းသီးတစ်လုံးလျှင် ကျပ် ၅,၀၀၀ မှ ၆,၀၀၀ ခန့်နှင့် ပန်းသစ်တော်သီးတစ်လုံးလျှင် ကျပ် ၁၀,၀၀၀ ကျော်အထိ ဈေးနှုန်းများ အဆမတန် ကြီးမြင့်လျက်ရှိကြောင်း သိရသည်။
