ထိုင်းခရီးသွားလုပ်ငန်း ရေရှည်ဖွံ့ဖြိုးတိုးတက်စေရေး မူဝါဒ ၇ ချက် ချမှတ်

ထိုင်းနိုင်ငံ ခရီးသွားလုပ်ငန်း ရေရှည်ဖွံ့ဖြိုးတိုးတက်ရေးအတွက် မူဝါဒ ၇ ချက်ကို ခရီးသွားလာရေးနှင့် အားကစားဝန်ကြီးဌာန ဝန်ကြီး Surasak Phancharoenworakul က ဇူလိုင် ၂၇ ရက်တွင် ပြုလုပ်သည့် TAT ဘုတ်အဖွဲ့ အစည်းအဝေး၌ ချမှတ်ခဲ့သည်။ အဆိုပါ မူဝါဒများသည် ခရီးသည် အရေအတွက်ထက် အရည်အသွေးမြင့်မားရေးနှင့် စီးပွားရေးအကျိုးအမြတ်များကို ဒေသအသီးသီးသို့ မျှဝေပေးနိုင်ရေးကို အဓိကထားသည်။ ဒေသတွင်း ခရီးသွားလာမှု မြှင့်တင်ရန် မြို့ငယ် ၅၅ မြို့သို့ ခရီးသွားများ ရောက်ရှိစေရေး၊ လေယာဉ်လက်မှတ် လျှော့ဈေး ပေးမည့် အစီအစဉ်များနှင့် Tomorrowland ကဲ့သို့ ကမ္ဘာ့အဆင့် ပွဲလမ်းသဘင်များကို အိမ်ရှင်အဖြစ် လက်ခံကျင်းပရေးတို့ ပါဝင်သည်။ ချမှတ်လိုက်သည့် မူဝါဒ ၇ ချက်မှာ အရည်အသွေး ဦးစားပေးခြင်း၊ နယ်မြေများသို့ ဝင်ငွေစီးဆင်းစေခြင်း၊ တစ်နှစ်ပတ်လုံး ခရီးသွားလာမှု မြှင့်တင်ခြင်း၊ ကမ္ဘာ့ပွဲလမ်းသဘင် ဗဟိုချက်ဖြစ်စေခြင်း၊ အကူးအပြောင်းကာလကို ထိရောက်စွာ စီမံခြင်း၊ ကောင်းမွန်သော အုပ်ချုပ်မှု စနစ်ဖော်ဆောင်ခြင်းနှင့် ခရီးသွားကဏ္ဍကို ကြိုတင်ပြင်ဆင်ခြင်းတို့ ဖြစ်ကြောင်း သိရသည်။