တောင်ကိုရီးယား၌ အရက်သောက်သုံးမှုအမျိုးသားများအကြား လျော့ကျလာပြီး အသက် ၃၀ အထက် အမျိုးသမီးများ၌ ပိုမိုမြင့်တက်လာ

တောင်ကိုရီးယားနိုင်ငံတွင် လွန်ခဲ့သည့် ဆယ်စုနှစ်တစ်ခုအတွင်း အမျိုးသားများ၏ လစဉ် အလွန်အမင်း အရက်သောက်သုံးမှု (Binge drinking) နှုန်းမှာ လျော့ကျလာသော်လည်း အသက် ၃၀ အထက် အမျိုးသမီးများအကြား အရက်သောက်သုံးမှုမှာမူ သိသိသာသာ မြင့်တက်လာကြောင်း ကိုရီးယား ရောဂါထိန်းချုပ်ရေးနှင့် ကာကွယ်ရေးအေဂျင်စီ (KDCA) ၏ အစီရင်ခံစာများအရ သိရသည်။ အထူးသဖြင့် အသက် ၂၀ နှင့် ၃၀ အရွယ် အမျိုးသားများအကြား အလွန်အမင်း အရက်သောက်သုံးမှု သိသိသာသာ လျော့ကျသွားသော်လည်း အသက် ၃၀ အရွယ် အမျိုးသမီးများ၏ လစဉ် အလွန်အမင်း အရက်သောက်သုံးမှုနှုန်းမှာ ၃၃.၈ ရာခိုင်နှုန်းမှ ၄၂.၁ ရာခိုင်နှုန်းအထိ ခုန်တက်သွားခဲ့သည်။အလုပ်ခွင်နှင့် အိမ်ထောင်ရေးဆိုင်ရာ ဖိအားများ၊ ပညာရေးနှင့် စိတ်ထွက်ပေါက် ရှာဖွေမှုများကြောင့် အမျိုးသမီးများအကြား သီးသန့် အရက်သောက်သုံးသည့် အလေ့အထ ပိုမိုများပြားလာခြင်းဖြစ်ကြောင်း စိတ္တဇကျန်းမာရေး ပညာရှင်များက သုံးသပ်ထားကြသည်။