လာအိုနိုင်ငံ၏ အမေရိကန်ဒေါ်လာ ၅ ဘီလီယံတန် လွမ်ပရာဘန်း မဲခေါင်မြစ်ရေအားလျှပ်စစ် စီမံကိန်း ၇၂ ရာခိုင်နှုန်း ပြီးစီးနေပြီး ၂၀၃၀ တွင် လည်ပတ်နိုင်ရန် လျာထား

လာအိုနိုင်ငံ၊ လွမ်ပရာဘန်းမြို့၏ မြောက်ဘက် ၂၅ ကီလိုမီတာအကွာ မဲခေါင်မြစ်ပေါ်တွင် တည်ဆောက်နေသည့် အမေရိကန်ဒေါ်လာ ၅ ဘီလီယံ တန်ဖိုးရှိ လွမ်ပရာဘန်း (Luang Prabang) ရေအားလျှပ်စစ် စီမံကိန်းသည် လက်ရှိတွင် ၇၂ ရာခိုင်နှုန်းအထိ တည်ဆောက်ပြီးစီးနေပြီဖြစ်ရာ လာမည့် ၂၀၃၀ ပြည့်နှစ်တွင် လျှပ်စစ်ဓာတ်အား စတင်ထုတ်လွှတ်နိုင်ရန် လျာထားဆောင်ရွက်လျက်ရှိသည်။ အဆိုပါ စီမံကိန်း တိုးတက်မှု အခြေအနေများကို လာအို စက်မှုနှင့် ကူးသန်းရောင်းဝယ်ရေး ဝန်ကြီးနှင့် ထိုင်း စွမ်းအင်ဝန်ကြီးတို့ ဦးဆောင်သည့် ကိုယ်စားလှယ်အဖွဲ့က ဇူလိုင် ၁၈ ရက်တွင် သွားရောက် ကြည့်ရှု စစ်ဆေးခဲ့ကြသည်။အဆိုပါ ရေအားလျှပ်စစ် စီမံကိန်းသည် လာအိုနှင့် ထိုင်းနိုင်ငံတို့၏ သန့်ရှင်းသော စွမ်းအင် အကူးအပြောင်း မူဝါဒများကို အထောက်အကူပြုမည်ဖြစ်ပြီး ဒေသတွင်း စွမ်းအင် လုံခြုံရေးကိုလည်း မြှင့်တင်ပေးမည်ဖြစ်သည်။ ထို့ပြင် UNESCO ကမ္ဘာ့အမွေအနှစ်ဝင် လွမ်ပရာဘန်း မြို့ဟောင်းကို ရေဘေးနှင့် အခြား ထိခိုက်မှုများ မရှိစေရေးအတွက် ရေမှတ်ထိန်းသိမ်းခြင်း၊ သဘာဝပတ်ဝန်းကျင်နှင့် ငါးမျိုးစိတ်များ ကာကွယ်ရေး ဆောင်ရွက်ခြင်း၊ တန် ၅၀၀ ဆံ့ သင်္ဘောများ ဖြတ်သန်းနိုင်မည့် စနစ်နှင့် ငလျင်ဒဏ်ခံနိုင်သည့် ဒီဇိုင်းများ ထည့်သွင်း တည်ဆောက်ထားကြောင်း ဖော်ပြထားသည်။