သက်လွန်ကလေးများ ပညာရေးအတွက် အသက်သတ်မှတ်ချက် ဖြေလျှော့၍ တန်းညှိပေးနိုင်ရန် ဆောင်ရွက်မည်ဖြစ်

အကြောင်းအမျိုးမျိုးကြောင့် ကျောင်းပြင်ပ ရောက်ရှိနေသည့် သက်လွန်ကလေးများ ပညာသင်ယူမှု အခွင့်အလမ်း မဆုံးရှုံးစေရေးအတွက် အသက်သတ်မှတ်ချက်များ ဖြေလျှော့ကာ Placement Test ဖြေဆိုခွင့်ကို လာမည့် ဩဂုတ်လ ဒုတိယအပတ်တွင် ဆောင်ရွက်ပေးမည်ဖြစ်ကြောင်း ပညာရေးဝန်ကြီးဌာန ဒုတိယဝန်ကြီးက ပြောကြားခဲ့သည်။ကျောင်းပြင်ပ အလယ်တန်းပညာရေး (NFME) Level-3 အောင်မြင်သူများကို Grade-9 အောင်မြင်သူအဖြစ် သတ်မှတ်ပေးမည်ဖြစ်ပြီး အသက် ၁၃ နှစ်မှ ၁၈ နှစ်အတွင်း ကလေးများမှာ ပုံမှန် အထက်တန်းကျောင်းသို့ ဆက်လက် တက်ရောက်နိုင်မည်ဖြစ်သည်။ အသက် ၁၈ နှစ်အထက် ကလေးများမှာမူ Grade-10၊ 11 နှင့် 12 တို့ကို ကျောင်းတွင်းစစ် ပြင်ပဖြေစနစ်ဖြင့် ဆက်လက် ဖြေဆိုနိုင်မည် ဖြစ်သည်။Placement Test ဖြေဆိုနိုင်ရန်အတွက် မြို့နယ်ပညာရေးမှူးများက စိစစ်ဆောင်ရွက်လျက်ရှိပြီး အရေးပေါ်အခြေအနေ ကြေညာထားသည့် ဒေသများမှ ကလေးများအနေဖြင့် ပညာရေး အထောက်အထား မပြည့်စုံပါက သက်ဆိုင်ရာ အုပ်ချုပ်ရေးမှူး၊ ကျောင်းအုပ်ကြီးနှင့် ကျန်းမာရေးမှူးတို့၏ ထောက်ခံချက်များဖြင့် ဖြေဆိုခွင့် ပြုသွားမည်ဖြစ်ကြောင်း သိရသည်။