တောင်ကိုရီးယားနိုင်ငံ၊ ဆိုးလ်မြို့တော်သို့ လာရောက်ကြသည့် နိုင်ငံခြားသား ခရီးသွား ဧည့်သည်များသည် ယခင်ကဲ့သို့ ဈေးဝယ်စင်တာများနှင့် ရှေးဟောင်း နန်းတော်များ သို့ရုံတင် မကတော့ဘဲ မြို့တွင်းရှိ ရိုးရာဈေးကြီးများနှင့် တောင်တက်လမ်းများသို့ပါ ပိုမို တိုးချဲ့ လည်ပတ်လာကြကြောင်း သတင်းရရှိသည်။ ဆိုးလ်မြို့တော် ခရီးသွားလာရေး အဖွဲ့အစည်း (Seoul Tourism Organization) နှင့် စေတနာ့ဝန်ထမ်း အဖွဲ့အစည်းများ၏ စစ်တမ်းများအရ ဘုခန်ဆန် (Bukhansan)၊ ဘူဂက်ဆန် (Bugaksan) နှင့် ဂွမ်အက်ဆန် (Gwanaksan) စသည့် တောင်များတွင် နိုင်ငံခြားသား တောင်တက်သမား ဦးရေ သိသာစွာ မြင့်တက်လာခဲ့ပြီး "K-Hiking" ခေါ် မြို့တော်တောင်တက် ခရီးစဉ်သည် ရေပန်းအစားဆုံး သဘာဝအခြေပြု ခရီးသွားလုပ်ငန်းတစ်ခု ဖြစ်လာခဲ့သည်။
တောင်ကိုရီးယားနိုင်ငံ၊ ဆိုးလ်မြို့တော်၏ တောင်တက်ခရီးသွား ဗဟိုဌာနများတွင် လာရောက်သူများ၏ သုံးပုံတစ်ပုံခန့်မှာ နိုင်ငံခြားသားများ ဖြစ်ကြပြီး တောင်တက်ကိရိယာများ အလွယ်တကူ ငှားရမ်းနိုင်ခြင်းနှင့် လမ်းညွှန် ဝန်ဆောင်မှုများ ကောင်းမွန်ခြင်းတို့က ခရီးသွားများကို ပိုမို ဆွဲဆောင်နိုင်ခဲ့ခြင်း ဖြစ်သည်။ ထို့ပြင် ဂွမ်ဂျန်စျေး (Gwangjang Market) နှင့် နက်ဆန်ပန်းခြံ (Naksan Park) တို့ကဲ့သို့ နေရာများသည်လည်း နိုင်ငံခြားသား ခရီးသွားများကြားတွင် ခေတ်စားလာသည့် နေရာသစ်များ ဖြစ်လာခဲ့ကာ၊ မြို့တော်အတွင်း ဘတ်စ်ကား သို့မဟုတ် မြေအောက်ရထားဖြင့် သဘာဝတောတောင်များသို့ အလွယ်တကူ သွားရောက်နိုင်သည့် ဆိုးလ်မြို့၏ ထူးခြားသည့် ပထဝီဝင် အနေအထားက ခရီးသွားများအတွက် အဓိက စွဲမက်ဖွယ်ရာ ဖြစ်နေကြောင်း သုံးသပ်ဖော်ပြထားသည်။
