ကမ္ဘာ့ဘောလုံးအဖွဲ့ချုပ် (FIFA) ၏ လက်ရှိဥက္ကဋ္ဌ ဂျီယာနီ အင်ဖန်တီနို (Gianni Infantino) သည် လာမည့် ဥက္ကဋ္ဌရွေးကောက်ပွဲတွင် စတုတ္ထမြောက် သက်တမ်းအတွက် ပြိုင်ဘက်ကင်းသည့် ထောက်ခံမှုများ ရရှိနေကြောင်း သိရသည်။ နိုင်ငံတကာသတင်းစာများ၏ ဖော်ပြချက်အရ လက်ရှိအချိန်တွင် ကမ္ဘာတစ်ဝန်းရှိ နိုင်ငံပေါင်း ၂၀၀ ကျော်က အင်ဖန်တီနိုကို ပြန်လည်ရွေးချယ်ရန် တရားဝင် ထောက်ခံထားကြပြီး ၎င်းသည် ဥက္ကဋ္ဌသစ်ရွေးကောက်ပွဲအတွက် တစ်ဦးတည်းသော ဝင်ရောက်ယှဉ်ပြိုင်သူအဖြစ် ရပ်တည်နေသည်။လက်ရှိကျင်းပနေသည့် ကမ္ဘာ့ဖလားပြိုင်ပွဲအတွင်း ဖီဖာ၏ လုပ်ပုံကိုင်ပုံများနှင့် အငြင်းပွားစရာ အခြေအနေအချို့ကြောင့် အင်ဖန်တီနိုအပေါ် ဝေဖန်မှုများနှင့် ထောက်ခံမှု လျော့ကျနိုင်သည်ဟု ယူဆမှုများ ရှိခဲ့သော်လည်း အဖွဲ့ဝင်နိုင်ငံအများစု၏ ပြိုင်ဘက်ကင်း ထောက်ခံမှုကို ဆက်လက်ရရှိခဲ့ခြင်း ဖြစ်သည်။ သို့သော် ဥရောပနိုင်ငံအနည်းငယ်မှာမူ ၎င်းကို ထောက်ခံခြင်းမရှိဘဲ အထူးသဖြင့် ဂျာမနီနိုင်ငံသည် အင်ဖန်တီနိုကို တရားဝင် ထောက်ခံမှုမပေးသေးသည့် ထိပ်တန်းနိုင်ငံအဖြစ် ရှိနေသည်။ထို့ပြင် ဖီဖာအဖွဲ့ဝင် ဘောလုံးအဖွဲ့ချုပ် (FAs) အချို့အနေဖြင့် ဖီဖာ၏ အတွင်းစည်းအတွင်းမှနေ၍ အင်ဖန်တီနိုဘက်က ရပ်တည်ပေးရန် ဖိအားပေးမှုများ ရှိနေကြောင်းလည်း သတင်းများ ထွက်ပေါ်လျက်ရှိသည်။
