ဧရာဝတီတိုင်းရှိ မိုးဆက်တိုက်ရွာသဖြင့် လယ်ကွင်းများ ရေမြုပ်မှာကို လယ်သမားများ စိုးရိမ်နေရ

ဧရာဝတီတိုင်းအတွင်း မိုးရက်ဆက်ရွာသွန်းမှုကြောင့် မြို့နယ် ၁၀ ခုထက်မနည်းရှိ မြေနိမ့်ပိုင်းလယ်ကွင်းများ ရေကြီးနစ်မြုပ်မည့်အန္တရာယ်နှင့် ရင်ဆိုင်နေရကြောင်းသိရသည်။ သွင်းအားစုစရိတ်ကြီးမြင့်ချိန်တွင် စပါးခင်းများ ပျက်စီးဆုံးရှုံးပါက အကြွေးထပ်တင်မည့်အရေးကို တောင်သူများ စိုးရိမ်နေကြပြီး ရေဘေးလွတ်လျှင်လည်း ရွှေခရုအန္တရာယ်ကို ထပ်မံရင်ဆိုင်ရဦးမည်ဖြစ်သည်။ လက်ရှိတွင် စပါးဈေးမကောင်းခြင်းနှင့် စိုက်ပျိုးစရိတ်ချေးငွေ ပြန်ဆပ်ရန် ဖိအားပေးခံရမှုများကြောင့် ယခုနှစ် မိုးစပါးစိုက်ပျိုးမှုမှာ ထက်ဝက်နီးပါးအထိ သိသာစွာ လျော့ကျသွားကြောင်း သိရသည်။