တောင်ကိုရီးယား အုပ်ချုပ်ရေးနှင့် လုံခြုံရေးဝန်ကြီးဌာန၏ စနေနေ့ (မေ ၂၃ ရက်) ထုတ်ပြန်ချက်အရ လာမည့် ဇွန်လ ၃ ရက်နေ့တွင် ကျင်းပမည့် "၉ ကြိမ်မြောက် တစ်နိုင်ငံလုံးဆိုင်ရာ ဒေသန္တရရွေးကောက်ပွဲ" (9th Nationwide Local Elections) အတွက် မဲစာရင်းများကို အတည်ပြုလိုက်ပြီဖြစ်ရာ စုစုပေါင်း မဲပေးပိုင်ခွင့်ရှိသူ ၄၄,၆၄၉,၉၀၈ ဦး (၄၄.၆၅ သန်းနီးပါး) ရှိကြောင်း သိရသည်။ ၎င်းပမာဏသည် လွန်ခဲ့သော ၄ နှစ်က ကျင်းပခဲ့သည့် ဒေသန္တရရွေးကောက်ပွဲထက် ၃၄၆,၄၅၉ ဦး ပိုမိုများပြားလာခြင်း ဖြစ်သည်။
မဲစာရင်းအချက်အလက်များအရ အမျိုးသမီးမဲဆန္ဒရှင် အရေအတွက်မှာ ၂၂.၅၅ သန်းကျော်ရှိပြီး အမျိုးသားမဲဆန္ဒရှင် အရေအတွက်ထက် ၄၅၇,၉၆၄ ဦး ပိုမိုများပြားလျက်ရှိသည်။အသက်အုပ်စုအလိုက် ခွဲခြားကြည့်ရာတွင် အသက် ၅၀ အရွယ် မဲဆန္ဒရှင်များမှာ စုစုပေါင်း၏ ၁၉.၃၄ ရာခိုင်နှုန်း (၈.၆၃ သန်းကျော်) ဖြင့် အများဆုံးကဏ္ဍတွင် ရှိနေပြီး၊ အသက် ၂၀ အရွယ် မဲဆန္ဒရှင်များမှာမူ ၁၂.၄၈ ရာခိုင်နှုန်း (၅.၅၇ သန်းကျော်) ဖြင့် အနည်းဆုံးအုပ်စု ဖြစ်နေသည်။ ယခုရွေးကောက်ပွဲတွင် ပြည်တွင်းမဲဆန္ဒရှင် ၄၄.၄ သန်းအပြင်၊ ပြည်ပရောက် ကိုရီးယားနိုင်ငံသား ၈၉,၁၅၁ ဦးနှင့် အမြဲတမ်းနေထိုင်ခွင့် ဗီဇာသက်တမ်း ၃ နှစ်ကျော်ရှိသည့် နိုင်ငံခြားသား မဲဆန္ဒရှင် ၁၅၁,၅၃၂ ဦးတို့လည်း ပါဝင်မဲပေးခွင့် ရရှိကြမည်ဖြစ်သည်။


