စင်ကာပူအမျိုးသမီးတစ်ဦး အမေရိကန်ရဲ့ အဆိုးဆုံးစာရင်းထဲ ပါဝင်လာ

အမေရိကန်ပြည်ထောင်စုရဲ့ လုံခြုံရေးဌာန (DHS) ကနေ ထုတ်ပြန်လိုက်တဲ့ "အဆိုးဝါးဆုံးသော ရာဇဝတ်ကောင်များ" စာရင်းထဲမှာ စင်ကာပူနိုင်ငံသူ Lim Seok Pheng ဆိုသူ အမျိုးသမီးတစ်ဦး ပါဝင်နေပါတယ်။ ဒီစာရင်းဟာ အမေရိကန်နိုင်ငံအတွင်းက လူမှုအသိုင်းအဝိုင်းတွေကို ခြိမ်းခြောက်နေတဲ့ "သတ္တဝါဆိုးများ" လို့ တင်စားခေါ်ဝေါ်ခံရတဲ့ ရာဇဝတ်ကောင်တွေကို စုစည်းထားတာဖြစ်ပြီး လက်ရှိမှာ လူပေါင်း ၂၅,၀၀၀ ခန့်အထိ ရှိနေပြီလို့ သိရပါတယ်။Lim Seok Pheng ရဲ့ နောက်ကြောင်းကို ပြန်ကြည့်မယ်ဆိုရင် သူမဟာ မက္ကဆီကို မူးယစ်ဂိုဏ်းတွေအတွက် အမေရိကန်ဒေါ်လာ ၄၈ သန်း (စင်ကာပူဒေါ်လာ ၆၁ သန်းခန့်) အထိ ငွေခဝါချပေးခဲ့တဲ့ အပြည်ပြည်ဆိုင်ရာ ငွေခဝါချမှု ကွင်းဆက်ကြီးတစ်ခုမှာ ပါဝင်ပတ်သက်ခဲ့သူ ဖြစ်ပါတယ်။ သူမဟာ New York မြို့ကို အခြေစိုက်ပြီး Chicago အစရှိတဲ့ မြို့ကြီးတွေကနေ မူးယစ်ဆေးဝါး ရောင်းရငွေတွေကို လိုက်လံသိမ်းဆည်းပေးခဲ့တာပါ။ သူမရဲ့ လုပ်ဆောင်ပုံတွေဟာ ရုပ်ရှင်ထဲကအတိုင်းပဲ လျှို့ဝှက်ဖုန်းတွေ သုံးတာ၊ အမည်ဝှက်တွေနဲ့ ပြောဆိုတာအပြင် ဒေါ်လာ ၁ တန် တန်ဖိုးရှိ ငွေစက္ကူတွေရဲ့ နံပါတ်စဉ်တွေကို "ပြေစာ" အဖြစ် သုံးပြီး လူမှန်မမှန် စစ်ဆေးတာမျိုးတွေအထိ ကျွမ်းကျင်ပိုင်နိုင်ခဲ့ပါတယ်။တစ်ကြိမ်ကို ဒေါ်လာ ၁ သန်းအထိ ရှိတတ်တဲ့ အဲဒီငွေတွေကို သူမက လက်ခံရရှိပြီးတဲ့နောက်မှာတော့ New York မြို့က တရုတ်စီးပွားရေးသမားတွေကို ပေးအပ်ပြီး သူတို့ရဲ့ တရုတ်နိုင်ငံက ဘဏ်အကောင့်တွေကနေတစ်ဆင့် ဂိုဏ်းခေါင်းဆောင်တွေဆီကို ငွေလွှဲပြောင်းပေးတဲ့ နည်းလမ်းကို သုံးခဲ့ပါတယ်။ သူမကို ၂၀၁၈ ခုနှစ်မှာ New York မြို့က John F. Kennedy International Airport မှာ ဖမ်းဆီးရမိခဲ့တာ ဖြစ်ပါတယ်။ အဖမ်းခံရပြီးနောက်မှာတော့ သူမဟာ အစိုးရဘက်တော်သား သက်သေအဖြစ် ဆောင်ရွက်ခဲ့ပြီး ဂိုဏ်းခေါင်းဆောင် Gan Xianbing ကို ဖမ်းဆီးနိုင်ဖို့ ကူညီပေးခဲ့ကာ ၂၀၁၉ ခုနှစ်မှာတော့ ငွေခဝါချမှုနဲ့ ပြစ်ဒဏ်စီရင်ခြင်း ခံခဲ့ရပါတယ်။ အခုအခါမှာတော့ သူမကို အမေရိကန်အစိုးရက နိုင်ငံကနေ မောင်းထုတ်ရမယ့် အန္တရာယ်ရှိ ရာဇဝတ်ကောင်စာရင်းထဲမှာ ထည့်သွင်းလိုက်ပြီ ဖြစ်ပါတယ်။