ဇူလိုင်လတွင် JLPT စာမေးပွဲဖြေဆိုရန် တစ်ဦးချင်းလျှောက်ထားသူများအနေဖြင့် Registration အဆင့်ကို ပြန်လည်ပြုလုပ်ရန် လိုအပ်ဟု MAJA အသိပေး

၂၀၂၆ ခုနှစ်၊ ဇူလိုင်လတွင် ကျင်းပမည့် ဂျပန်ဘာသာအရည်အချင်းစစ်စာမေးပွဲ (JLPT) ကို တစ်ဦးချင်းလျှောက်ထားဖြေဆိုမည့်သူများအနေဖြင့် Registration (အကောင့်ဖွင့်ခြင်း) အဆင့်ကို အသစ်ပြန်လည်ပြုလုပ်ရမည်ဖြစ်ကြောင်း မြန်မာနိုင်ငံဂျပန်ပြန်ပညာသင်ဟောင်းအသင်း (MAJA) က ယနေ့ ဖေဖော်ဝါရီ ၃ ရက်တွင် အသိပေးထုတ်ပြန်လိုက်သည်။ ၎င်းတွင် ယခင်က လျှောက်ထားဖူးသူများလည်း ပါဝင်ပြီး၊ အချက်အလက်မှားယွင်း၍ ပြန်လည်ပြင်ဆင်ရပါက အတည်ပြုချက်ရရှိရန် ၃ ရက်မှ ၅ ရက်အထိ ကြာမြင့်နိုင်သဖြင့် ကြိုတင်ဆောင်ရွက်ထားရန် တိုက်တွန်းထားသည်။ အထူးသဖြင့် တစ်ဦးချင်းလျှောက်ထားသူများ၊ အသက် ၁၀ နှစ်အောက် ကလေးငယ်များနှင့် သံဃာတော်/သီလရှင်များအနေဖြင့် စာမေးပွဲလျှောက်လွှာလက်ခံသည့်ကာလတွင် အချိန်မီဖြေဆိုခွင့်ရရှိစေရန် Registration အား ကြိုတင်ပြီးမြောက်အောင် လုပ်ဆောင်ထားရန် လိုအပ်ကြောင်း သိရှိရပါသည်။