(၉၄) ကြိမ်မြောက် မော်လမြိုင် နှစ်ကျိပ်ရှစ်ဆူ လှည့်လည်ပူဇော်ပွဲတွင် ဆုရရှိသည့် ရပ်ကွက်အသင်းများကို ပြည်နယ်အစိုးရအဖွဲ့ ဆုချီးမြှင့်

မွန်ပြည်နယ်၊ မော်လမြိုင်မြို့တွင် ကျင်းပခဲ့သည့် (၉၄) ကြိမ်မြောက် မြို့လုံးဆိုင်ရာ နှစ်ကျိပ်ရှစ်ဆူဘုရားများ လှည့်လည်ပူဇော်ပွဲတွင် ဆုရရှိခဲ့ကြသော ရပ်ကွက်အသင်းများကို ဖေဖော်ဝါရီ ၁ ရက် ညနေပိုင်း၌ ပြည်နယ်အစိုးရအဖွဲ့က ဆုများချီးမြှင့်ခဲ့သည်။ ပြိုင်ပွဲတွင် သိမ်ကုန်းရပ်ကွက် ဥပဿဂါအဖွဲ့ (ဘုရားအမှတ် ၂၈) က ပထမဆုရရှိကာ ဝန်ကြီးချုပ် ဦးအောင်ကြည်သိန်းက ဆုငွေ ကျပ်သိန်း ၃၀ ချီးမြှင့်ခဲ့ပြီး၊ မုပွန်ရပ်ကွက်အသင်း (ဘုရားအမှတ် ၁၉) က ဒုတိယဆု ကျပ်သိန်း ၂၀ နှင့် ဈေးကြီးတောင်ပေါ်တန်းရပ်ကွက်အသင်း (ဘုရားအမှတ် ၂၇) က တတိယဆု ကျပ် ၁၅ သိန်း အသီးသီး ရရှိခဲ့ကြကြောင်း သိရှိရပါသည်။