ရန်ကုန်အပါအဝင် မြို့ကြီးတွေမှာ လုယက်မှု၊ သတ်ဖြတ်မှုတွေ တိုးလာတာကြောင့် တန်ဖိုးကြီးလက်ဝတ်လက်စား မဝတ်ဆင်ဖို့ သတိပေးမှုတွေများလာ

ရန်ကုန်၊ နေပြည်တော် အပါအဝင် မြို့ကြီးများတွင် လုယက်မှု၊ သတ်ဖြတ်မှုနှင့် အုပ်စုဖွဲ့ အကြမ်းဖက်မှု ဖြစ်စဉ်များ စိပ်လာခြင်းကြောင့် ပြည်သူများအနေဖြင့် တန်ဖိုးကြီး လက်ဝတ်လက်စားများနှင့် စမတ်ဖုန်းများကို ပေါ်ပေါ်ထင်ထင် ဝတ်ဆင်ကိုင်ဆောင်ခြင်း မပြုကြရန် လူမှုကွန်ရက်နှင့် မြို့နေလူထုအကြား သတိပေးမှုများ ကျယ်ကျယ်ပြန့်ပြန့် ရှိနေသည်။ မကြာသေးမီက ဗိုလ်တထောင်နှင့် ရွှေပြည်သာမြို့နယ်တို့တွင် ကျောင်းသားငယ်များနှင့် ကလေးငယ်များထံမှ ဖုန်းနှင့် ရွှေထည်ပစ္စည်းများကို အကြမ်းဖက်လုယက်သည့် ဖြစ်စဉ်များ ဖြစ်ပွားခဲ့သလို၊ နေပြည်တော်တွင်လည်း အမျိုးသမီးတစ်ဦးကို အဓမ္မပြုကျင့် သတ်ဖြတ်လုယက်သူများကို သေဒဏ်ချမှတ်ခဲ့သည့် ဖြစ်စဉ်များ ရှိခဲ့သည်။ ရန်ကုန်မြို့တွင် လူဦးရေ ထူထပ်လာမှုနှင့်အတူ YBS ယာဉ်ပေါ်၌ ခါးပိုက်နှိုက်ခံရမှုနှင့် နေအိမ်အတွင်း ဝင်ရောက်ခိုးယူမှုများ နေ့စဉ်လိုလို ရှိနေသဖြင့် အုပ်ထိန်းသူများအနေဖြင့် ကလေးငယ်များကို အထူးဂရုစိုက်ရန်နှင့် မိမိတို့၏ လုံခြုံရေးအတွက် မပေါ့ဆဘဲ သတိထားသွားလာကြရန် ပြည်သူအချင်းချင်း တိုက်တွန်းနှိုးဆော်နေကြကြောင်း သိရှိရပါသည်။