အမေရိကန်သမ္မတ ဒေါ်နယ်ထရမ့်သည် အီရန်နိုင်ငံအတွင်းသို့ ဝင်ရောက်စီးနင်းတိုက်ခိုက်မှုများနှင့် အထူးတပ်ဖွဲ့ဝင်များ အသုံးပြုသည့် စစ်ဆင်ရေးများကို ဆင်နွှဲရန် စဉ်းစားနေကြောင်း မီဒီယာများ၏ ဖော်ပြချက်အရ သိရသည်။ပန်တဂွန်စစ်ဌာနချုပ်မှ တင်ပြထားသော အီရန်အပေါ် စစ်ရေးအရ အရေးယူဆောင်ရွက်နိုင်သည့် နည်းလမ်းမျိုးစုံကို သမ္မတထရမ့်က စဉ်းစားသုံးသပ်နေသော်လည်း တဟီရန်အစိုးရနှင့် သံတမန်နည်းလမ်းအရ ဖြေရှင်းရန်နှင့် ဆွေးနွေးညှိနှိုင်းမှုများ ပြုလုပ်ရန်အတွက်လည်း လမ်းဖွင့်ထားဆဲဖြစ်ကြောင်း အမေရိကန်အရာရှိများကို ကိုးကား၍ နယူးယောက်တိုင်းမ်သတင်းစာက ဖော်ပြခဲ့သည်။သတင်းရင်းမြစ်များ၏ အဆိုအရ ထရမ့်သည် အီရန်နိုင်ငံအပေါ် တိုက်ခိုက်နိုင်သည့် ပိုမိုကျယ်ပြန့်သော ရွေးချယ်စရာစာရင်းကို မကြာသေးမီက လက်ခံရရှိခဲ့ကြောင်း သိရသည်။ ၎င်းတို့ထဲတွင် အမေရိကန်တပ်ဖွဲ့ဝင်များက ဝင်ရောက်စီးနင်းတိုက်ခိုက်မှုများအပြင် အီရန်၏ နျူကလီးယားနှင့် ဒုံးကျည်စခန်းများကို ပိုမိုပြင်းထန်စွာ တိုက်ခိုက်မှုများလည်း ပါဝင်သည်။သူစဉ်းစားနေသည့် နည်းလမ်းများအနက် အန္တရာယ်အရှိဆုံးမှာ ၂၀၂၅ ခုနှစ် ဇွန်လက အမေရိကန်၏ တိုက်ခိုက်မှုအတွင်း မထိခိုက်ဘဲ ကျန်ရှိနေသည့် အီရန်နျူကလီးယားစခန်းများကို ဖျက်ဆီးရန် သို့မဟုတ် အသုံးမပြုနိုင်အောင် ပြုလုပ်ရန်အတွက် အမေရိကန်အထူးတပ်ဖွဲ့များကို လျှို့ဝှက်စေလွှတ်ခြင်းပင် ဖြစ်သည်။ အခြားရွေးချယ်စရာ တစ်ခုမှာ အီရန်ခေါင်းဆောင်ပိုင်းနှင့် တိုက်ရိုက်ဆက်နွှယ်နေသည့် နေရာများကို ဆက်တိုက်တိုက်ခိုက်ခြင်းဖြင့် ပြည်တွင်းမငြိမ်မသက်မှုများ ဖြစ်ပေါ်စေရန်နှင့် အာဏာအပြောင်းအလဲအတွက် လမ်းခင်းပေးရန် ဖြစ်သည်။အစ္စရေးနိုင်ငံကမူ အီရန်၏ ဒုံးကျည်အစီအစဉ်နှင့် ဆက်စပ်နေသော နေရာများကို ပစ်မှတ်ထားတိုက်ခိုက်ရန် ဝါရှင်တန်ကို တိုက်တွန်းနေသည်။တစ်ချိန်တည်းမှာပင် အမေရိကန်သမ္မတအနေဖြင့် ပန်တဂွန်မှ အကြံပြုထားသော မည်သည့်စစ်ရေးနည်းလမ်းကိုမျှ ရွေးချယ်ခြင်း မပြုရသေးဘဲ သံတမန်ရေးရာ ချဉ်းကပ်မှုကိုသာ ဆက်လက်လိုလားနေကြောင်း အရာရှိများက အလေးပေးပြောကြားခဲ့သည်။ ထရမ့်၏ ခြိမ်းခြောက်မှုများသည် အီရန်ကို ဆွေးနွေးပွဲစားပွဲဝိုင်းသို့ ရောက်လာစေရန် တစ်စိတ်တစ်ပိုင်း တွန်းအားပေးခြင်းဖြစ်ကြောင်း အချို့သတင်းရင်းမြစ်များက မှတ်ချက်ပြုကြသည်။အစောပိုင်းတွင် ထရမ့်က အီရန်နိုင်ငံဆီသို့ "ဧရာမရေတပ်အုပ်စုကြီး" ဦးတည်နေပြီဟု ပြောကြားခဲ့သည်။ တဟီရန်အနေဖြင့် ဆွေးနွေးပွဲများသို့ ပြန်လာပြီး နျူကလီးယားလက်နက် လုံးဝစွန့်လွှတ်ခြင်းအပါအဝင် "မျှတပြီး သင့်တော်သည့်" သဘောတူညီချက်တစ်ခုကို ရရှိလိမ့်မည်ဟု မျှော်လင့်ကြောင်းကိုလည်း သူက ပြောကြားခဲ့သည်။ ပြီးခဲ့သည့် ဇွန်လအတွင်းက "Midnight Hammer" ဟု အမည်ပေးထားသည့် စစ်ဆင်ရေးဖြင့် အီရန်ရှိ နျူကလီးယားစခန်းများကို အမေရိကန်က တိုက်ခိုက်ခဲ့ကြောင်း သမ္မတက ပြန်လည်အမှတ်ရစေခဲ့ပြီး "နောက်တစ်ကြိမ် တိုက်ခိုက်မှုက ယင်းထက် အဆပေါင်းများစွာ ပိုမိုဆိုးရွားလိမ့်မည်" ဟု သတိပေးကာ ထိုကဲ့သို့ ထပ်မံမဖြစ်ပွားစေရန် တိုက်တွန်းခဲ့သည်။
